Mitang phur Russia thlawhna kap thla

Ukrainian President Volodymyr Zelesnky chuan western Russia-a thlawhna kahthlak a nih hnuah Moscow chu Ukrainian mi tangte nunna game khelh nan mai maia hmangah a puh.
Ukraine border hnaih Belgorof region-a thlawhna a tlak hnuah Zelensky chuan international inquiry a ngiat nghal bawk a.
Russia erawh chuan Kyiv chuan Ukrainian lung in tang 65, Russian crew paruk leh escort pathum chuanna Il-76 thlawhna chu Kyiv kahthlak tiin a sawi ve thung.
Moscow chuan heng lung in tang te hi lung in tang inthleng kalpui meka inthleng tawn tura phurh an ni a ti a.
Ukraine thung chuan a hmaa tih thin dang angin lung in tang inthleng dawna airspace him taka siam tura ngenna an dawng hauh lo an ti thung.
President Zelensky chuan thil chiang tak chu Russian-te chuan Ukrainian lung in tangte nunna, an chhungte rilru leh kan society emotion angte chu game khelh nan a hmang mai mai a ni a ti a. Thudik lailanin a awm ngei tur a ni a ti bawk.
Belgorod regional governor Vyacheslav Gladkov chuan thlawhna chu Yablonovo, Belgorod atanga 70km vela hlaah a tla tiin a sawi a. Residential area bul lawkah tla in thlawhna chhunga chuang an thi vek tiin a sawi bawk.
Thlawhna chhunga chuangte tu te nge an nih chiah hriat theih a la ni lo va, mahse, Ukraine military intelligence chuan inremna kan siam angin chung lung in tangte himna chu Russia mawhphurhna a ni a ti a.
Tun tumah hian Russia chuan tum dang angin airspace him taka siam tura hriattirna min pe hauh lo a ti bawk a. “Russia hian tumsa nei lawkin lung in tangte nunna game khelh nan a hmang a ni” tiin a sawi bawk.
Ukraine leh Russia te chuan indo tirh atangin lung in tang inthleng tawnna hi an kalpui fo a ni bawk a. BBC Russia Editor Steve Rosenberg chuan chiang takin Russia chuan thlawhna kahthlak chu Ukraine chu sulsutu zawk anga lantira thiamlo zawka chhuah a tumna a ni a ti bawk.
Prisoner exchange thlen hma hian Ukrainian official-te chuan Russian sipai an mante chu Russia nena hmun him an tih an siam dunah inthleng tawn turin inremna an siam vek a ti a. Nilaini chawhnu lam khan Belgorod khawthlang lam border check point 100km a hlaa inthleng tawn tura tih an ni.
Russia chuana military transport thlawhna chu Chkalovsky air base atangin Belgorod pana a thlawh laiin Ukraine air force-te chuan anti-aircraft missile hmangin an lo kapthla tiin a sawi nghal thung.
Ukrainian sorkar thung chuan Russia chuan Ukraine lakah special information operation a kalpui a ni tia sawiin a tum ber chu Ukrainian society tihnghin a ni a ti bawk.
Ukraine parliamentary human rights commissioner Dmytro Lubiets chuan Ukrainian-te chu official source chauh ringa awih tawh turin a ngen a. “inrunluihna thiltih te ring tawh suh u, kimchang takin information pekchhuah thin a ni ang” tiin a sawi.
Andrei Kartapolov, chairman of Russia’s parliamentary defence committee chuan thlawhna pahnihna Ukrainian lung in tang 80 phur chu koh haw nghal a ni a ti thung a. “Tunah chuan lung in tang inthleng kan kalpui tawh lovang” tiin a sawi.
Lung in tang inthleng tam ber chu tun thla tir khan thlengin Ukraine chuan Russian lung in tang 248 a chhuah a, Russia pawhin Ukrainian 230 chhuahin tang inthleng chu United Arab Emirates hmalaknaa kalpui a ni.
Russia hian Ukranian civilian leh sipaite mi 8,000 vel lung in tang a la nei bawk niin Ukraine’s Coordination Hq on the Treatment of PoWs chuan a sawi a, chin hriatloh mi sing chuang an awm a ti bawk.
Belgorod hi Ukraine ramri atang 40 km vela hlaa awm niin indona chhuah atangin air strikes leh drones tena an beih fo a ni bawk.
December thla pawh khan air strike avangin Belgorod ah hian mi 25 in nunna chanin mi 100 chuangin hliam an tawrh phah tawh bawk a.
Ukraine indona hian kum thum hmel a hmu tawh a. Karkalta khan Russia chuan Bakhmut khawpui bul lawka khaw pakhat a la tiin a sawi a, Kyiv chuan engmah sawi a la nei lo thung.
Tun hnaiah Russia air attack a nasa zual zel a, Thawhlehni pawh khan Ukrainian city a beihnaah mi 18 in nunna chanin mi 130 chuangin hliam an tuar bawk.
Ukrainian Defence Minister Rstem Umerov chuan Ukranian force-te chuan ammunition an tlakchham laiin Russia chuan tun hnai thla hnih chhungin missiles 600 chuang leh drones 1,000 chuang hmangin a bei tawh tiin a sawi.
Ukraine hi chuan Russia beih nan drone hmang deuh berin karkalta tawp lam pawh khan St Peterburg bul hnaia major gas export terminal chu beiin kangmei a tichhuak nasa hle a ni.