Mizo ei leh in zirchiangin international seminar nei

Mizo ei leh in zirchiangin international seminar nei
Mizo ei leh in chungchang zirhona, ‘International Seminar on Mizo Foodways: Cultural Traditions, Societal Transformations and Political Dimensions Across Time’ chu Thawhlehni khan Govt Aizawl West College-ah neih a ni a, vawiinah chhunzawm a ni ang.
Seminar-ah hian Prof. Sajal Nag, Assam Royal Global University chuan keynote address pe in, ei leh in leh mihring nun inzawm dan thukzia a sawifiah a. Mizo nuna ei leh in pawimawhna leh ei leh in hian Mizote Mizo nihna a tilang thin tih a sawi. Medical science lama mithiamte chuan Mizo zinga thisen sang tam chhan pakhat chu bai ei nasat vanga nia an hriat thu a sawi a ni.
Thusawitu dang Devin Creed pawhin ‘Famine Foods in South Asia: History, Uses, and Legacy’ tih sawiin tam laia South Asia miten ei leh in an dap dan hrang hrang a sawi.
Seminar hi Tribal Research Institute, Govt Aizawl West College leh Pachhunga University College-a History department ve ve tanghoa buatsaih a ni a. Hmanpuitu Art & Culture minister C Lalsawivunga chuan seminar kaltlanga Mizo food culture zirchianna chuan kan nihphung, culture leh tradition kan zir leh hriatzauna kawngah rah tha tak a chhuah ngei a beisei tih a sawi a ni.
A hawnnaah assistant professor Dr Malsawmdawngliana chuan seminar buatsaih a nih dan report a pe a; associate professor Dr Rohmingmawii’n ei leh in chungchang chu history-a ngaihpawimawh a nih chhoh dan a sawi.
Seminar-ah hian Mizo ei leh in chungchanga thuziak hrang hrang 30 chuang zirho tura chhawpchhuah a ni a. Assam Global University Guwahati, Duke University North Carolina US, East-West University Chicago US, University of Hyderabad leh Tezpur University atanga lokalte paper ngaihthlaka zirho a ni.