Mizo farmer 4-in award dawng

Mizopa kuthnathawh lama mi hlawhtling pali chuan ram pum huap farmer award an dawng.
‘Millionaire Farmer of India Award 2023’ chu Nilaini khan New Delhi-ah sem a ni a. Mizoram atangin kuthnathawktu pali – KB Sangkhuma, Rabung Khawzawl district; M Hrangmawia, Siata Siaha district; VL Remruatpuia, Darlak Mamit district leh Vanlalfela, N Vanlaiphai Serchhip district te an ni. Award dawngtute hi Mizorama KVK-in nomination an siam atanga an thlanchhuah an ni a. He program hi Krishi Jagran chhawpchhuah niin, Mahindra Tractor-in an sponsor a ni.
Khawzawl district atanga he award dawngtu KB Sangkhuma hian sawhthing, fu leh silk pangang khawiah hma lain, kumin hian sawhthing quintal 70 chingin a tlem berah quintal 400- 500 a thar beisei a ni a; heng a hmalakna atang hian he Award hi a dawng a ni.
Siaha district atanga dawngtu M Hrangmawia hian sial, bawng, vawk, kel, beram leh ar vulhin hma a la a, tunah hian sial hi a note nen 250 vel neiin, sangha dil lian tak tak 5 atanga sangha tam tak thar leh a ranvulh dangte avangin he Award hi a dawng.
Mamit district atanga dawngtu VL Remruatpuia hian zirnaa MBA a zawh hnuin bawng vulh leh sangha dilah hma la in, a thar chhuahte atangin he award hi a dawng.
Serchhip district atanga award dawngtu Vanlalfela hian chi hrang hranga sunhlu a sawngbawlna atangin he award hi a dawng a. Vanlalfela hian an khuaa sunhlu tam tak awm chu engemaw taka siam chhuah theih a nih ringin theihtawp chhuahin a bei a, tunah hian sunhlu candy, sunhlu powder, sunhlu den leh sunhlu oil siam chhuakin eizawn nan a hmang a ni.