Sawrkarna siam thei tura MLA ngah tawk ZPM Legislature Party leader atana thlan thar Lalduhoma chuan Nilaini khan larsap Dr Hari Babu Kambhampati chu Raj Bhavan-ah hmu in sawrkarna an siam thei tih a hrilh a, chief minister tura ruatna larsap hian a lo hlan ZPM Legislature Party hruaitute hian Lalduhoma hoin Nilaini chawhma khan ama sawmna angin larsap hi an hmu a. ZLP deputy leader K Sapdanga bakah ZPM president Lalliansawta leh MLA Vanlalhlana ten an tawiawm. Lalduhoma hian sawrkar siam tura an party a tlin thu official-in a hriattir a. Larsap hian lo pawmin chief minister atan Lalduhoma hi appointment a lo pe nghal a ni.
Sawrkar lakluh hun atan December 8 (Zirtawpni) nise, a hmun atan Raj Bhavan Circular Lawn nise, tia sawrkar ruahmanna chu pawmpui a nih thu ZLP leader Lalduhoma hian larsap hi a hrilh. Sawrkar lakluh zawh veleh protem speaker thlan nghal a ni ang.
Larsap a hmuh zawha thuthar thehdarhtuten an kawmnaah Mizoram chief minister thar tur Lalduhoma chuan sum lama pachhia leh state budget nei tlem tan chuan central atanga sum lo lut chu kan intunnunna ber a nih avangin, a tangkai thei ang bera centrally sponsored scheme hman a nih theih nan larsap hian theihtawp chhuahpui a inhuam thu a lo hrilh tih a sawi.
Union Home minister Amit Shah nen an inbia a, Mizorama raltlan enkawl chungchang a rang thei ang berin an sawidun dawn tih a sawi a. A bikin Manipur atanga raltlante chu India danpui hnuaiah khua leh tuite chu khawiah pawh an inbenbel a phalsak hrim hrim avangin, state sawrkar tla ta in a lo enkawl dan chhunzawm a, a aia tha zawka tih dan a awm chuan ruahmanna an siam tur thu a sawi.
Myanmar raltlan chungchangah External Affairs minister S. Jaishankar nen pawh an inbia tih Lalduhoma hian sawiin, India sawrkar foreign policy leh thenawm ramte dinhmun chu hmaihma ngeia sawidun an tum tih a sawi a ni.
-- Advertisement --
4December 5 zan khan ZPM Legislature Party hi an inhmukhawm a. ZPM working president, Aizawl North-III bial atanga MLA atana thlantlin K Sapdanga rawtna angin 9th Mizoram Legislative Assembly-a House leader atan Lalduhoma chu lungrual takin an pawm. Lalduhoma rawt angin deputy leader atan K Sapdanga chu lungrual taka pawm a ni bawk.
4ZPM Legislature Party member inhmukhawm hian Mizoram sawrkarin rawtna a lo siam, sawrkar lakluh hun atan December 8 (Zirtawpni) nise tih leh, a hmun atan Raj Bhavan nise tih chu a pawmpui.
4December 7 (Ningani) ah Val Upa Council-in ZPM Legislature Party leader Lalduhoma hi an kawm anga, sawrkar ruangam (Council of ministers/ speakers adt. chungchang) sawihoin thutlukna an siam ang.
4Sawrkar thar lakluh hun (swearing-in ceremony) hi December 8 chawhma dar 11.00 a neih tura ruahman a ni a. Hemi ni hian council of ministers (12) lakluh nghal tum a ni.
4December 12-ah Assembly Session neih tura ruahman a ni.