Mizo film ‘Mo Sual’ leak out avangin FIR theh lut

Mizo film ‘Mo Sual’ leak out avangin FIR theh lut
Mizo film ‘Mo Sual’ tih chu Runmawi Apps kaltlanga man chawia en theih tura thla khat vel an dah hnuah a screen record a leak out tih an hriat velah film siamtute chuan thuneitute hnenah FIR theh lut nghalin, nimin khan Cyber Crime lamin film ti-leak out-tu ni a puh hi an ko niin film siamtute chuan an sawi a, hetiang boruak te hial a awm takah hian film director leh production crew-te chuan hetiang lamah hian mipuite fimkur turin an ngen tih an sawi bawk.
Mo Sual director leh production crew-te chuan thuchhuah siamin, “Mizoramah film industry lamin hma kan sawn chho zel a,a buaipuitu te pawhin risk la tak meuh meuhin zan tam tlaivarin, ruah sur leh ni sa hnuaiah, chaw mumal pawh ei hman lek lovin nasa takin film pakhat a puitlin theih nan tha leh zung sengin an bei ve thin a, chutiang a nih avang chuan viewers lamte pawhin min khawngaih ula, a leak out theihna lakah min venpui zawk ula kan duh takzet a ni,” an ti.
Mo Sual director Melody G Fanai chuan, “Mizo ten lemchan khawvelah nasa takin hma kan sawn a, hei hi hun rei lo te, kum 5 kal ta vel chauh kha ala ni. Lemchan khawvela kan hmasawnna hi a thlawhin a thlawk dawrh dawrh a ni ber mai.
“Film siam lama tui tak tak kan awm chho zel a, achangtu te zingah pawh talented tak tak, film an chan atanga entertainment khawvel a eizawnna hmu chho te pawh an awm ta mek zel a, hei hian kan thalaite hmakhua pawh nasa takin a su kaw chho zel dawnin alang a, beiseina pawh a sang chho hle.
“Chutianga hmalam hun beiseina nen a kan thlir mek laia keimah anga film siam thin thenkhatte sum tam tak leh ngaihtuahna, tha leh hun senga an film siam thenkhat a lo LEAK OUT leh thin hian min tithinrimin, min ti beidawng lek lek thin a, a chang chuan a chhe theihtawp an duh anih hi ti a thapui thawh a, lemchan khawvela ka thawhpuite nen intiam ruala hmalak hi ka duh fo thin.
“Mi te angin sulhnu tha tak hnutchhiah nei ve lem lo mah ila, cassette reel hunlai atanga lemchan lo buaipui ve tawh thin leh lo vahvaihpui tawh thintu ka ni ve a, tunhnu a rawn tui thar thut pawh ni lovin theihtawp kan lo chhuah ve tawh thin. Tun dinhmunah pawh hian zan mut hun mumal lo te, thil pawh ei mumal hman lo leh khawl thil vil reng ngai karah kan film chan mek atan ngaihtuahna sen nen, a chang chuan damlo a tluk hlawl chang te pawh ka nei fo thin. Chutiang taka thawkrim leh rilru leh ngaihtuahna senga kan siam MO SUAL film heti maia a leak out hi chu ka ngaihthiam zawng a ni ve lo.
“Ka thiante tawh ang ka tawk ve anih hi ka tih rualin kei ni film siamtute hmakhua atan leh awareness atan pawh kei chuan a tawp thlengin he thil hi ka hmachhawn dawn a ni. A ti-leak out tu kan hre tawh a, FIR kan thehlut tawh a, kan police ten engkim min buaipui zui sak tawh ang.
“He a thil tih hi rukruk nen danglamna a awm lova, chuvang chuan a phu tawk hremna hmuh tir turin theihtawpin ka bei zel dawn a ni. Ka thiante pawhin hetiang hi an lo tawk zauh zauh tawh thin. Tun hnaiah Mizo hmeichhe zingah chuan film maker/ director/ producer awm te zingah a active awmchhun ka ni a, he issue-ah hian thuhnu ka dawn vak dawn lo. A ti-leak out tu te an lo man fo tawh thin a, sum an chawi thin tih pawh an hresa vek mai chauh pawh nilovin, kan film-ah ngei pawh WARNING inpe lawkin kan tar thlap a, chutiang pawh min zahsak lo a, ka mizopui ngeiin hetianga min ruksak leh min thehdarhsak duh hi ka la na lehzual. Atawp ka thleng dawn a, chumi a tan chuan lawyer te leh thianthate nen hma kan la ho mek a, hei hian film siamtu leh a entu mipuite leh film changtute inkarah inzahtawnna tha tak a hrinchhuah chuan chu chu ka lawmmanah ka ngai. In ngaihdam hi kan uar lutuk a, hei hian a ni lo zawngin min kaihhruaina chen a awmin ka hria,” a ti.