Mizo history zirchianna atan sawrkar a inhawng – Art & Culture minister

Mizo history zirchian kawngah Mizoram sawrkar a inhawng a, kawng hrang hrangin hma lak mek a ni tih Art & Culture minister C Lalsawivunga chuan a sawi.
Mizoram University History & Ethnography Department-in Mizoram leh a chhehvela chengte history zirchian chungchang, “Beyond Borders and Texts: Reframing the History and Polity of Highlanders in the Eastern Himalayan Borderlands” tih thupui hmanga international seminar an buatsaih a hmanpuinaah Art & Culture minister chuan, Mizo history chu hnam dangin min ziahsak thin a, a nihna dik tak an hre fuh lo fo a, dik tawk loa an ziah a awm tih a sawi.
“Mizote ngeiin Mizo history kan zirchian a, kan ziah ve a tul tawh. Archaelogy leh zirna peng dang pawh Mizo history zirchianna atan hman a tul a; Art & Culture department chuan hemi kawngah hian hma a la mek a, tunhnaia ruhro hmuhchhuah thar thenkhat chu a upat dan hre turin carbon dating tih a ni,” a ti.
Mizoram sawrkar chuan Mizo history zirchian tul a tih avangin Art & Culture department hnuaia Tribal Research Institute bultumin Mizo tobul chhui turin hma an la a, zirna peng hrang hranga mithiamte tel tir an ni tih C Lalsawivunga hian a sawi.
Seminar-ah hian Indiana University USA atangin Prof David C Williams chuan thupui a sawihawng a. North East India historian lar Prof Sajal Nag pawhin thu a sawi. Mizoram University-a finance officer Prof Vanlalchhawna’n a hmanpui bawk.
Seminar hian ni thum a awh a, mithiam hrang hrangin paper an present dawn. Hetihlai hian tunlai Indigo Airlines service a mumal loh avangin Mizoram pawn atanga seminar-a lo tel turte chu an lokal thei hlawm loa, online hmangin thu an rawn sawi tih a buatsaihtute chuan an sawi a ni.