Mizo hnam chhan ngam lo zawngin thil kan ti ngai lo – K Vanlalvena

Member of Parliament a nih chhungin Mizoram leh hnam chhanna atan theihtawp an chhuah thin a, central hotute laka tlaktlum loh hlauh vangin hnam chhan ngam lo zawngin thil an ti ngai lo tih K Vanlalvena chuan a sawi.
Rajya Sabha MP K Vanlalvena hian thuthar thehdarhtute a kawmnaah, July 19 hian a MP term a hmang zo dawn tih a sawi a. Covid hrileng vangin a MP term tan tirh kum hnih dawn lai MP-LAD Fund sem tur sawrkar laipui atangin pek an ni lo a. Hei mai hi a ni loa, Covid 19 avang hian central atangin state hmasawnna tur sum hai chhuah a harsa hle a; chuti chung chuan ram hmasawnna tura an thil thlen thenkhat erawh sawrkar laipuiin a ngaihpawimawh sak thin a, a lawm hle tih a sawi.
2020 July 20 atangin MP a ni tan a, MP a nih chhung hian Parliament Session vawi 17 an nei a. Hengah hian loh theih loh avang a nih loh chuan a kal nitin a, Parliament Session-a a attendance record chu 97% a ni tih a sawi. Parliament Session-ah hian thu vawi 26 a sawi a, chairman phalna in vawi 24 a sawi a, chairman phalna loin Manipur buaina chungchang vawi hnih a sawi tih a sawi a ni.
“Covid hrileng, Assam nena ramria buaina, Manipur-a chi leh chi inkara buaina, Myanmar military coup avang leh Bangladesh Chittagong Hills-a buainaa raltlante harsatna hrang hrang avangin Mizoram leh hnam chhanna atan theihtawp kan chhuah thin. Kan tih theih tam lo mah se, Mizoram state chhung leh pawna kan unaute harsatna maimitchhin san zawngin rilru kan pu ngai lo. Central sawrkar hotute laka tlaktlum loh hlauh vangin hnam chhan ngam lo zawngin thil kan ti ngai loa, chutiang rilru chu kan pu ngai lo,” a ti.
MP LAD fund hmanna hrechiang duh chuan RTI hmangin zawhfiah theih reng a ni tih K Vanlalvena hian a sawi a. Covid leng vangin fund hi kum hnih dawn an nei loa, a MP term hun chhung rei ngaihtuahin hmasawnna hna an thawh tlem phah chu pawi a ti hle tih a sawi a ni.
Rajya Sabha MP ni tura candidate-tu Pu Zoramthanga leh a kaihhruai MNF party leh MLA-te chungah lawmthu a sawi tih sawiin, a phu hauh loh duhsakna, chawimawina, fakna hlan thintu Mizoram mipui leh, khawvel hmun danga awm Zofate hnenah lawmthu a sawi tih a sawi bawk.
MP a nih chhungin mimal , party leh pawl emaw kohhran emaw hnam emaw pawisawi a nei a nih chuan ngaihdam a dil tih a sawi a ni.