Mizo hnam lamah intihsiak

Mizo Cultural Artistes’ Association (MCAA) kum 25 a tlin lawmna atana Art & Culture department leh MCAA tangdun buatsaih “MCAA Silver Jubilee Chheihlam Intihsiak 2023” chu nimin khan a hmawr bawk a ni a. Top 10 intihsiak Vanapa Hall-ah neih niin Art & Culture minister R Lalzirliana’n a hmanpui.
Intihsiak hi category hnih – kum 16 hnuailam leh kum 17 chunglama then a ni a. Tel duhte hian an lam lai video footage chu Organising Committee hnenah an thehlut a, heta tang hian category hnih atana top 10 ve ve hi thlan niin, intihsiak pui ber neihpui an ni.
Kum 16 hnuailamah hian video 20, kum 17 chunglamah video 33 thehluh a ni a. Intihsiakna hi chihnih – hla rang leh hla muang hmanga neih a ni.
Kum 16 hnuailamah C. Laldintluanga & PC Lalremsangi, East Lungdar inkawp chu pakhatna an ni a. Mipa lam thiam ber chu F. Lalhruaitluanga (8), Saihnuni Sailo Memorial School Bungkawn Aizawl niin hmeichhia lam thiam ber chu Lalhmangaihsangi, Mamit Dinthar a ni. Pakhatna hian Rs 10000, pahnihna Rs 7000, pathumna Rs 5000 bakah trophy leh chawimawina thuziak a kengtel theuh a ni.
Kum 17 chunglamah Vanlalrinnunga, College Veng & Jenny Lalnunthari, Dinthar Aizawl inkawp chu pakhatna an ni a. Mipa leh hmeichhe lam thiam berah pawh an ni pahnih hi thlan an ni. Kum 17 chunglam intihsiaknaa lawmman pakhatna hian Rs 30000, pahnihna Rs 20000, pathumna Rs 15000 a ni a, trophy & chawimawina thuziak a kengtel theuh a ni.
MCAA member-te hi Art & Culture department hnuaia Mizo hnam lam zir chhuakte an ni.