Mizo rimawi khawvela arsi lian PB Lianhminga a awm ta lo

Mizo rimawi khawvela arsi lian PB Lianhminga a awm ta lo
Mizo musician zinga hriathlawh ber pawl PB Lianhminga, kum 49, chu May ni 3, 2023, zing dar 4:25 khan Aizawl Hospital-ah hun eng emaw chen an inenkawl hnuah a thi a, nimin chawhnu dar 1 khan Dawrpui Vengthar Presbyterian Kohhran Gospel Centenary Hall-ah vuiin, Dawrpui Vengthar thlanmualah phum a ni. PB Lianhminga hian a nupui Lalnunpuii leh a fate pathum a kalsan.
PB Lianhminga hi 2019 vel atang khan damdawi inah a lut chhuak deuh sek tawh a, kuminah pawh tun tuma damdawi in a lut hi vawi ruk a luhna a ni tawh a, han hniam deuh chang te nei mah se pa tuarchhel a nih avangin a tha chhuak leh mai thin a, tun tum erawh a tuar chhuak zo ta lo a ni.
PB Lianhminga hi 2000 kum hmasa lam atangin Mizoram rimawi khawvelin a hming kan hre lar tan a, 2000s kum hmasa lama zaithiam lar zawng zawng chuan music track an siam tir vek ang tih tur khawpin a kut chhuak music track pawh a tam a ni. A hunlaia recording studio hriathlawh VEGA legh Zozam studio-ah te pawh a lo thawk zak zak tawh thin. Track siam bakah hian Albatross band-ah keyboardist a ni a, Albatross-a a tel hma leh hnuah pawh band hrang hrang a lo pui kual ve nual tawh bawk a ni. Lianhminga hian zaithiam harsa zawk te bakah khawlaia mitdel zai thinte thlengin an music track a thlawnin a siam sak fo thin a ni.
Lianhminga hi keyboardist anga hriat lar a ni nain, music lama a tuipui hmasak chu bass guitar a nih thu a u Rebecca Saimawii chuan a sawi a, “Bass guitar hi a thuam a, a perh zawk thin a, keyboard pawh a thiam tho a, mahse, bass kha a khawih hmasak zawk a ni. A hnuah keyboard te neiin, soundtrack siamah kan hre lar ta a, a vanglai kha chuan mi zawng zawngin an pan vek emaw tih mai tur kha a ni ve a ni,” a ti.
PB Lianhminga te hi unau paruk, hmeichhia pathum leh mipa pathum an ni a, an unau hian rimawi lamah talent an nei tha hle a, Mizo hmeichhe zaithiam hriat hlawh ber te zinga mi Rebecca Saimawii, Boomarang vocalist PB Lianmawia (Atea) leh Magdalene bassist PB Liansangzuala te pawh a unaute an ni a, an unau zinga mi tho, musician hriat hlawh Victor Vanlalhruaia (Scavenger Project) nupui PB Lianzuali pawh The Scavenger Project ‘Acceptable (Min Ensan Suh)’ tih music video-ah khan zai lama a talent kan hmu tawh bawk.
PB Lianhminga u, Rebecca Saimawii hi Bangalore-ah awmin, a nau vuinaah hian a tel thei lo va, Makuri chuan, “Kei Bangalore-ah ka awm a, chuti chung chuan mite that zia hi kan hmu nasa a ni. Damdawi inah te pawh mi an thahnem a, a fanuin min lo call-a, ‘haw then rawh u’ tih ngai khawpin min ngaihventu an tam a, kan lawm tak zet a ni.
“Ka nau hi a mizia ka tluk loh em em chu a zaidamna hi a ni. A nupui fanau leh a unaute, keini ngei pawhin a aw ki vin hi tumahin kan la hre lo. Dam deuh hian thil a sawi a, a nui vur vur thei zel a, hei hi ka fakna a ni. Engmah hi thil sawisel a nei ngai lo a, a tlawmngai em em bawk a, a dam loh chauh em em lai pawhin ka tirhnaah a hnial ngai lo. A nunah han chak loh ve deuhna te chu nei mah se, chutiang tih lohah chuan hauh ngai hian a awm ngai lo. He kan chhiat tawhnaah hian a musician puite leh hmun hrang hrang atanga amah duhsaktu an tam zia hi kan hmuh belh zel a, a ropui ka ti lutuk,” a ti.
PB Lianhminga hian hlate pawh a phuah a, Albatross-in an sak ‘I Ropui Nan’ tih leh Hlutei sak ‘I Lainatna’ tih hla te pawh hi a phuah a ni.