Mizo tleirawlte chetha zel Mizoramin semi-final an lut ta!

On Oct 10, 2025 6 0

Mizo tleirawlte chetha zel
Mizoramin semi-final an lut ta!
Bangalore-a khelh mek All India Inter SAI Women’s Hockey Championship 2025-ah nimin khan Mizoram chuan quarter-final match pakhatah STC Ranchi (Jharkhand) an hmachhawn a, he match-ah hian Mizoram chu 3-1-in an chak.
He inkhelah Mizoram goal thum zinga goal hnih hi Durtlang Mel-5 tleirawl Laldinpuii (Puipuii), jersey no 14 thun a ni a; goal khat dang hi jersey no.3 K. Vanlalpeki (Apektei), Durtlang Mualveng thun a ni bawk.
Ti hian, Mizoram chuan semi-final an lut a, vawiin, Zirtawpni hian STC Hissar (Haryana) nen final luh an inchuh ang.
Sawi tawh angin, India Women’s hockey-ah chuan Haryana hi an chungnung hle a, Tokyo Olympic 2020-ah pawh khan women player 9 lai thawh thei an ni a, Mizo team tan fiahna lian an tling dawn a, an paltlang zo a nih chuan champion an beisei ngam zual sauhin a rinawm!
Semi-final match an khelh leh turah hian hnehna an chan ngei theihna’n Mizoram coach, manager leh player-te chuan Mizoram mipuite tawngtaipuina an ngen.
Nilaini khan Mizo tleirawlte hian an match hnihnaah STC Badal (Punjab) chu sikhat faiin an hneh a, he match-a goal awmchhun leh Mizoram chakna goal ni zui ta hi jersey no 11 Remruatpuii khung a ni a; Mizoram jersey no. 3 K. Vanlalpeki (Durtlang Mualveng) chu ‘player of the match’ atana thlan a ni bawk.