Mizoram CS tur ngaihtuah mek

Mizoram CS tur ngaihtuah mek
Mizoram chief secretary Dr Renu Sharma chu kumin October hian a superannuation pension-in a chhuak dawn a, a thlaktu tur zawn mek a ni.
Tunhnaia New Delhi-a chief minister Lalduhoma zin chuan MInistry of Home Affairs hotute a sawipui a. Ministry of Civil Aviation secretary ni lai Vumlunmang Vualnam chu chief secretary atan hian an dil tih a sawi.
Union Home secretary chuan amah Vumlunmang Vualnam hian Mizoram chief secretary-a awm hi a duh chiah lo nia a hriat thu a lo hrilh avangin amah hi an va be nawn leh a, chief secretary nih a duh tih a sawi chu Home secretary hnenah hian an hriattir lehnghal tih a sawi.
“A ni (Vumlunmang Vualnam) a rem lo a nih pawhin, chief secretary ni thei tur IAS AGMUT cadre ho atanga lo thliar chhuak a, chu chu la en ho leh turin kan ti ta a ni,” Lalduhoma hian a ti.
Mizoram sawrkarin chief secretary atana a ngen Vumlunmang Vualnam hi Indian Administrative Service 1992 batch Manipur cadre a ni a; Sawrkar laipuiah Ministry of Finance additional secretary, Ministry of Home Affairs joint secretary, Ministry of Finance & Company Affairs deputy secretary hna a chelh tawh a. World Bank executive director advisor bakah Manipur sawrkara hna hrang hrang a chelh tawh zingah Health & Family Welfare commissioner leh Transport director te a tel a ni. Ministry of Civil Aviation secretary hna hi 2023 September atang khan a chelh tan.
The Aizawl Post thudawn danin, Mizoram chief secretary-a Mizo/ Zohnahthlak hi an pension hnu ah Congress party-a lut an awm nual tawh avangin centre-a BJP sawrkar hian Mizo dah a phur vak lo nia sawi a ni.