Mizoram hmun thenkhatah sazu puang

Rawthing tam vangin sazu a puang mek a, hriat theih chinah Mizoram district pali a tuam tawh. Sazu puang hi Mamit district-ah hriat hmasak ber a ni a, tun thlengin khaw 34 vel a tuam tawh. District Agriculture Office lam hriat danin, sazu puang hi tlangram lo neihna zelah a ni a, leilet buh an la khawih lo nia hriat a ni. Zan khat thilthua lo pakhat an beih fai pak pawh a awm tih thu dawn a ni.
Lunglei district-ah chuan Mamte leh Lungrang khuaah sazu hi a puang a, Serchhip district-a Khawbel khuaah puang tawh. Siaha district lamah pawh a puang a, khaw 3/4 vel a tuam tawh nia thu dawn a ni.
Agriculture department chuan sazu-in an buh a eichhiatte hi a hranpa in chhawmdawlna a pe thei loa, district thuneitu lamah a thlensak thei thung tih an sawi. Hetihlai hian sazu suatna atan department hian tur a sem a, a hman dan tur zirtirin an loah a kalchilh a. Sazu puanna khua a awm chuan department hotute hriattir rang turin an hrilh a ni.
Hetihlai hian Health & Family Welfare department-a Integrated Disease Surveillance Programme (IDSP) chuan mipui hriat tur tichhuakin, tunlaia sazu puang mekah mihringa natna chi hrang hrang thlen theitu natna hrik engemawzat an pu darh thei a. Heng zingah hian tunlaia natna hriat hlawh tak – rannung seh (Scrub typhus) a tel. Natna a thehdarh theih dan chu – seh, ham, an zun leh ek, thawk luh (inhalation), kutlawnga khawih, zawhte leh uiin an man atanga tihpalh thil vanga kai chhawn, hrik a ni tih a sawi.
Sazu atanga mihringin natna hrang hrang a kai thei tih pawh sawiin, heng natna lanchhuah dan tlangpui chu – khawsik, tha na, tihrawl na, chau, thalbe vung, pumna leh kawthalo, luak, ruh chuktuah vung leh na, taksa durh leh pan a ni tih a sawi a. Heng natna/ insawiselna nei chuan nunna atan a hlauhawm avangin a rang thei ang berin doctor hnai berah inentir turin a ngen.