Mizoram-in remna leh muanna kan neih hi tihchhiat kan phal lo – Chief minister

Mizoram-in remna leh muanna
kan neih hi tihchhiat kan phal lo
– Chief minister
Mizoram-in chak taka hma a sawn chhan chu remna leh muanna kan neih tlat vang a ni a, chu chu tihchhiat an phal lo tih chief minister Lalduhoma chuan a sawi.
Inrinnia Aizawla Bru Student Association (BSA) Gen. Hqrs bultuma Bru kum thar Kut – Boisu neih a hmanpuinaah chief minister chuan Mizorama hnam peng hrang hrang cheng hote inngeih takin kan khawsa thin a. Hetianga lungrual taka kan khawsa ho hian kan ram a timawi a, a tinuam a. Kum tam tak chhung chu India rama state ralmuang berah kan inchhal tawh a ni, tiin a sawi.
India ramah mahni hnamzia leh tih dan tha chawinung turin zalenna kan nei a. Mahni hnamzia leh kalphung chawilar duh luat vanga hnam dang tih dan ngai theih loh erawh thil dik a ni thei lo tih sawiin, hnam hlawm lian deuh leh hlawm te deuhte kan nih avangin awm dan chin tawk thiam tlan a ngai tih a sawi. “A lian zawk nih vanga a te zawk hnualsuat lutukte, a te zawk nih vanga pangchan leh lutukte hi a tha lo ve ve. Midang ngaihtheih lohna lam chi reng reng hi a tha loa; hnam anga inhnuaichhiahna, sakhua ang zawnga inbeihna a awm thiang lo. Ralthuam leka inlakhran tumna lam phei chu a awm kan remti lo bur,” a ti.
Mizoram mi kan nih chuan Mizoram thatna tur kan ngaihtuah ve reng thin tur a ni tih Lalduhoma hian sawi bawkin, “Mi tih tur thil tha sawi hi a harsa lutuk loa, midang thawh chhuah sa sawisel sak pawh a awlsam. Chutiang thu leh hla chu social media-ah a tam thin hle. Khua leh tui tha, ram hmangaihtu dik chuan kan phak tawka ram tana kan tih ve theih kan ngaihven reng tur a ni,” a ti.
Bru Students Association hruaituten an hmuh apianga an sawi thin, hun rei tak atanga an lo beisei tawh Bru House cum Hostel chu Tanhril-ah sak a ni dawn tih chief minister hian a sawi a. Sum pawh a awm tawh a, reiloteah hna tan thuai tum a ni, tih a sawi.
BSA president Lalromawia Apeto leh Bru Welfare Union of India president Biakthuama Molshoy te pawhin thu an sawi a, hun rei tak an lo dil a an lo beisei tawh thin, Bru House cum Bru Hostel sawrkarin a sa dawn ta chu an lawm tih an sawi a ni.
Boisu Kut hi Bru kumthar Kut a ni a, kumin hi Bru Student Association bultuma an lawm tum 4-na a ni. BSA Shillong Cultural Troupe leh BSA Aizawl Branch, Bodo Students’ Union MZU ten hnam lam an entir a ni.
Aizawlah hian lehkha zir mek leh hnathawka awm Bru sangkhat chuang an awm niin an sawi.