Mizoram kutah Khelo medal pathum

Mizoram kutah Khelo medal pathum
Tun thla kal mek tir lam October ni 3-8, 2024 chhunga Arunachal Pradesh state khawpui ber Itanagar-a khelh zawh tak
2nd Asmita Taekwondo, Khelo India Womens League (East Zone)-ah Mizoram aiawhtute’n medal pathum an hlawhchhuak a, chu’ng zinga pahnih chu silver niin, a dang pakhat chu bronze a ni thung.
Silver medal awrhtute hi R. Lalbiaknuami leh Esther Vanthangpuiite niin, Esther Lalchhanhimi kutah bronze medal a lut.
Biaknuami hian Senior Kyorugi (fight) Under 49 kg huangah khelin, a hmatch hmasaber a bye hnuin SSB (2-1), Arunchal Pradesh (2-0), Meghalay (2-0) aiawh a paltlang vek hnuah final a thleng.
Final-ah hian a thlengtu Arunchal Pradesh player lakah 1-2-a tlawmin silver medal a lungawipui mai a ngai ta a ni.
Cadet under 59 kg huanga khel Khawruhlian chhuanvawr Esther Vanthangpui chuan silver medal a sualchhuahna kawngah round hmasaber a bye phawt a, chutah Odhisa (2-0), Assam(2-1) leh Manipur (K.O.) a hneh hnu final-ah Meitei player bawk hmachhawn lehin, 2-1-in a chak lo.
Mizoram tana bronze medal pakhat latu Chhinga Veng tleirawl Esther Lalchhanhimi medal awrhna hi cadet individual poomsae inelnaah a ni.
Estheri chungah hian Arunchal Pradesh leh Assam aiawhte’n gold leh silver an la.
R. Lalbiaknuami leh Esther Vanthangpuiite hi thla thara khelh tur national level Khelo Womens League-ah East Zone aiawhin an tel zui ang.
Khelo India Womens League-ah hian state pakua bakah SSB leh Assam Rifles an tel.
Tuntum Itanagar-a Mizoram team fehchhuak player pasarihte kha coach Lalsangzuali leh technical official Zohmingthanga leh Felix Lalnunpuiate’n an hruai a, vawiin hi Aizawl an luh leh hun tura ruat lawk a ni.