Mizoram leh Industry
Tun hnaiah Commerce & Industries minister chuan ‘The Industrial and Investment Policy of Mizoram 2025’ leh ‘The Mizoram Procurement Preference Policy for MSEs 2025’ a tlangzarh a. Industry din duh tak tak thalaite tan sawrkarin hmun siamsak a tum a, sawrkar policy nen tangkawpin hma an la dawn, tih a sawi a. Mizoram hi industry lamah kan hniam hle a, industry lama hmalakna lian hmasa kan neih chu kum 1982-a din, Zuangtui Industrial Estate hi a ni awm e. Industry din duh tan ram zau tak theh a ni a, tunah hian handloom, oxygen plant, plastic water tank, pipe, flour mill, steel fabrication, mineral water, carpentry leh neuh neuh dang siam a ni. Hetih rual hian, industry buaipui ve chiah lo, industrial estate chhunga inbengbel chhungkaw tam tak an awm tawh a, C&I minister-in a sawi danin industry dinna tur license nei si, cancel sak mi 16 an awm a ni awm e. Hei bakah hian Industrial Growth Centre, Luangmualah pawh plot 7 cancel tawh niin mi 30 chuang koh an ni bawk.
Hetih rual hian district hrang hranga industrial estate awm zat hi 12 a nih laiin, heng zinga pathum- Hmunhmeltha (Champhai), Pangbalkawn leh Meidum te chu develop an la ni lo a, chumi awmzia chu, industrial estate atana ruahman tawh ni si, industry dinna tura pawimawh bulpui pathum – inkalpawhna kawngpui, power leh tui a la awm lo tihna a ni.
Industrial Policy hi 1989 atangin Mizoramin a nei ve a, mahse industry lamah hma kan sawn uak uak phah lem lo. A chhan tam tak a awm thei ang a, chung zingah chuan industry dinna tura pawimawh Power kha kan nei tha lo; tunah chuan Power lamah hma kan sawn chho a, industry lam pawhin hma a sawn ve ta a nih hi.
Tuna industrial policy tharah hian ‘investment policy’ a tel tak avangin thalai lehkhathiam entrepreneurship lama tuite tan chuan kawng zau tak a inhawng dawn niin a lang a. Hetih rual hian, industry kalpui theih tur hi a tam zawk chu agro-based industry a nih dawn avangin, industry chawmtu tur material heng – thlai/thei chin leh ranvulh lama tanlak a pawimawh dawn a, chu chuan contract farming a hring chhuak ang a, kuthnathawktute tan eizawnna kawng thar tam tak inhawng thei tura beisei theih a ni ang.