Mizoram mila zirlaibu

Nimin khan Mizoram Primary Teachers’ Association (MPTA) chuan Councillor meeting neiin resolution pathum an siam a, chung zingah chuan, “Primary School Text Book hi Mizoram leh Hnam mila siam ni rawh se,” tih a tel a.
MPTA resolution atang hi chuan, primary school text book-te hi Mizoram leh hnam mil lova siam vek anga ngaih theih a nihna lai a awm a; mahse, han belh chian deuh chuan, zirlaibu thenkhat, hnam dang thil pholan awm thin an ngaimawhna a nih hmel a. Entir nan pawl li zirlaibu pakhat ‘environmental studies’-ah chuan hnam dang hming, hnam dang thil, state dang environment eng eng emaw a tel nual a. Heng bakah pawh hian, thil dang dangah, hnam thil bosal hlauhawmna tur thilte a lo awm pawh a ni mahna le; kan hriatpui vek loh avangin a zirlaibu ngawr ngawr hi chu eng pawh lo ni se, Mizoram mil, Mizoram context-a zirlai dah duhna thinlung an putna, an thlirna tlang, an ideology lam hi thil pawimawh tak chu a ni awm e.
Zirlaibute hi State Council of Educational Research and Training (SCERT) Mizoram buatsaih a nih a rinawm a. Zirlaibu buatsaih kawngah hian text book committee te, chumi hnuaiah chuan sub-committee te awm lehin chung committee-ah te chuan zirtirtu hrang hrang aiawhte pawh member an tel nual a rinawm a. Zirlaibu siam a nih hun laia a thatlohna emaw, a diklohna emaw hriat lohte kha, kum tam tak han kalpui takah chuan remchang lo, dik zan lo tih hriatchhuah chauh te pawh a awm thei ang tih a rinawm a ni.
Hun rei tak experience lo nei tawh zirtirtute thu leh hla hi thuneitu sang zawkte pawhin ngai pawimawhin, dawhkan khat kilho a, thil awmzia ngun taka sawiho leh ngaihtuahho a pawimawh dawn hle niin a lang.
Zirnaah hian a bulthut lam, a grassroot level uluk hi a pawimawh tih zirbingmiten an sawi thin a, chuvang chuan school education hnuaiah hian elementary stage hi uluk taka kalpui a nih phawt chuan, a chung lamah harsatna em em an nei ngai tawh lo. A tlangpuiin Mizorama zirnaah hian, a hnuai lam uluk si lova, a chung lam, a ler lama thuai nghek hi kan kalphung hi a ni deuh roh a, hei hi inenfiah nan hman a pawimawh khawp ang. Zir thiamna ngawr ngawr hi a ni lova, an tet te atanga an zirlaibua hnam thil hriatchianna leh hnam rilru putna tur thil kan tuh tel thiam hi a pawimawh dawn hle a ni.