Serchhip-a khelh mek Mahindra Maxx Pikup Mizoram Open Boxing Championship-ah boxer 103 chhuakin, zanin hian an khar ang.
-- Advertisement --
Thawhlehni zan khan Serchhip Boxing Hall-ah sports minister Robert Romawia Roy-te chuan a hawng a, mipa weight hrang 10-ah Mizoram hmun hrang hrang atangin boxer 90 an tel a, hmei-chhia weight hrang pasarih awm tura rua-hman a nih laiin pa-ngaah mi 13 an tel.
Kg 60 chung lama tel tumin Asian silver medal latu Lalbuatsaihi a inbuk a, a khelhna tur weight-ah midang an awm loh avangin a inlan thei ta lo a ni.
Ningani zanah khan weight hrang pasarih – hmeichhia pin, lightfly, fly leh bantam bakah mipa lightwelter, welter leh lightheavy final zawh fel a ni.
Zanin, Zirtawpni zan dar 8-ah kharna in-khawm hman a ni dawn a, weight hrang pariat – hmeichhia pathum leh mipa pangaah final khelh a ni ang.
Serchhip District Boxing Association chuan 42nd Assam Rifles thawhpuiin Boxing Hall-ah boxer 88 a thleng a, ei leh in tumsak vekin, naupang leh weight zang lam tel lova boxer 100 chuang an inlan thei chu an beisei phak bak a nih thu an sawi.
Assam Rifles lamin boxer tha bik an chhinchhiah a, hna pek emaw inzirna tha zawk an neih zui theihna tur emawa hma lakpui an tum a, anni hian championship an tiphuisui hle.
A hawnna inkhawm atanga a tawp thlengin LPS Vision-in LPS 1-ah live-in inhnek zawng zawng a pechhuak kal mek a; Serchhip Boxing chuan inhnek an huai-hawt tawha ropui leh hlawhtling ber a nih thu leh Serchhip khaw mi-puiin an hlutin a hmun-ah entu pawh an tha-hnem hle tih an sawi.