Speaker-in USA chhuahsan tawh
‘Mizoram khi a la chhe vek dawn’
USA-a zin speaker Lalrinliana Sailo-in USA a chhuahsan tawh a, tun karah Mizoram a thleng turah ngaih a ni.
April ni 11-a Aizawl chhuahsan Lalrinliana Sailo hi Chin Association of Maryland te sawmna chhanga zin a ni a, Mizoramin Myanmar atanga raltlante a lo enkawl danah an lawm avangin zin tur hian an sawm a ni.
Tun hnaiah USA-a a thusawi video a darh a, a clip tawi te te a darh bakah youtube-ah a puma en theih tura dah a ni bawk. A thusawiah hian Mizoram chungchang a sawi a, “Mizoram khi a la chhe vek dawn,” a ti. Thu a sawi lai hian video-in a thla an la tih a hria tih te, tihdarh tur a ni tih te a hria niin a ngaih theih a, minister Robert Romawia Royte chungchang a sawi dawn paw’n ‘Hei hi chu mi tihchhuahsak lo ula,’ tiin, tahrik ni 1-ah a office-ah minister Robert Romawia Royte a len thu a sawi hman tihah, video-ah a ri a awm lo zui ta a ni.
Rina Sailo hian Mizorama sorkarna changtu party leh eptu pawl te, sorkarna chang tawh te a kheng a, “KA thinlung hi a na a ni,” tih te, “Opposition te hi ka dem ngawih ngawih,” tih tawngkam te a hmang.
Zirna chungchanga Mizoram tihsual chu zirtirtu laknaah politics a inrawlh tiin a sawi a, “Pu |hena hun laiin political appointment-in an ti a, matric pass lo kha an la vak mai a ni,” tiin sorkar kal tawh chungchang a sawi a, “Congress-ah khan education kha kan hlamchhiah lutuk,” a ti bawk. “Tun kan sorkarah pawh political appointee an la tam lutuk,” a ti bawk.
January ni 30-ah khan chief minister kaihhruaiin rulling party MLA-te an thukhawm nia sawiin, “Tuna kan sorkar kal dan hi kei chuan, ka lung a awi lo ka ti,” tiin chutah chuan a sawi chhuak niin a sawi.
Sorkar hnathawk fel tak pakhatin i department-ah cheng nuai 100 an ziak ral a, hrehawm a tih thu a sawi tiin chumi tum chuan deputy chief minister hnenah a sawi niin a sawi.
Corruption chungchang a sawi a, Aizawl atanga Lungleia an sawn P&E department-a SDO-in thla tin a hlawh bakah Rs 350000 atanga Rs 370000 a dawng niin a sawi a, PWD JE pakhatin kum hnih chhungin cheng nuai 103 a nei thei niin a sawi bawk.
Opposition party-te a dem thu a sawi a, “ZPM lah hi tawngkam ringawt a ni bawk sia,” tiin, Assembly session-a zawh tur, corrpution chungchang pawh a hrilh a, zawhna a siamsak vek a, a chhanna an hmuh hnuah a hmunah an kal duh leh si lo niin a sawi. “Congress-a ka thian hluite chuan, an quality-in a pha lo reng reng,” a ti a, sorkar ding lai thlak tumtute’n thil chhawp an nei lo reng reng nia sawiin, “Mahse kha mite rawn thlak tumte khan eng nge an tih ang?” a ti.
Sorkar administration siamthat a ngai tiin a sawi a, department te tak te te pawhin a hranin secretary an nei a, hlawh tam tak leh medical reimbursement te, an staff te hlawh te, chutiang chuan sum a kal ral nasa nia sawiin, “Khiti khian kan ram hi kan ei zo mai mai,” a ti. “Kan vai hian thuah kan ngai,” a ti bawk.
A thusawi tir lamah “… Chuvangin ka haw ang a, CM hi ka hrilh ang a, BJP ka zawm dawn em ni aw ka ti,” a ti a, hemi chungchang hi a sawi zui lem lo.
Hun an hmanna hmun hi tute in emaw a nih hmel a, Maryland nia hriat a ni.
Speaker-in USA chhuahsan tawh ‘Mizoram khi a la chhe vek dawn’
Get real time updates directly on you device, subscribe now.