Mizoram pumah Remna Ni hmang Home minister hoin MZP-in hmang

June 30 kha India sawrkar leh Mizo National Front-in inremna thuthlung an ziah ni a a, kumin hi a champha vawi 40-na a ni. Mizoram hmun hrang hrangah hman a ni a, Aizawlah chuan Mizo Zirlai Pawl huaihawtin Home minister K Sapdanga hoa hman a ni.June 29 khan Mizoram larsap leh chief minister chuan kumin Remna Ni denchhen hian chibai bukna thuchah an tichhuak a. Larsap Gen. Vijay Kumar Singh (Retd) chuan, he ni hi Mizoram chanchina hun chhinchhiah tlak leh danglamna thlentu pawimawh, Mizoram zalen, hmasawn leh thang chak siam tura beiseina thar petu a ni, tiin, kum 40 kaltaa inremna thuthlung ziah chuan Mizoramah remna tluantling a thlen a, hei hian hun engemawchen buainain a chiah chu titawpin, inpumkhatna, inremna leh hmasawnna lam hawiin bung thar a kaipui ta tih a sawi.
“Remna hi buaina laka fihlimna a ni mai loa, mitin leh ram pum khawsak phung thuk taka nghawng thei thil a ni. Remna leh muanna tel loin eng hmasawnna mah a kal hleithei lo a. Remna leh muanna chuan mihring dikna leh mipui rorelna chawisangin inrintawnna, dawhtheihna leh inunauna tha a siam. Tunlai khawvel dan pawisak lohna leh dinhmun inkar zau takah hian lungrual taka khawsak ho tluka hlu a awm chuang bik lo,” a ti.
Chief minister Lalduhoma pawhin, rambuaiin kum 20 min chim chhung khan ram hmasawnna hna a kal thei loa, kum 1986-a remna leh muanna a awm atang khan mumal takin hmasawnna hna kalpui ve theih chauh a ni, tiin, chu chuan remna leh muanna hlutzia min hrilh a. Kan ramin hma a sawn zel theihnan remna leh muanna kan vawnnun a pawimawh zia pawh min hrilh tih a sawi. “Remna leh muanna boruak hnuaia kan awm hnuah Mizoram hian hma kan sawn chak hle a; hetianga chak taka hmasawnna hna a kal theih chhan hi a ni tih hria in, kan ram hi ram ralmuang takah siam zel ang u,” a ti.
MZP Gen. Hqrs. buatsaiha Remna Ni kum 40-na lawmna hmanpuitu Home minister K Sapdanga chuan, kumina Remna Ni lawmnaa remna atana thahnemngai taka thawktu zing ami Rev Dr CL Rema chawimawina hlan a ni chu a lawmpui tih sawiin, “Remna siam tura ralthuam tunga lo pen chhuak MNF chungah lawmthu kan sawi a, lo pen chhuahna kawng sialsaka lalthuthleng kiantu Pu Lal Thanhawla inpekna kha kan chawimawi nawn a; kohhran hruaitute, Mizo Zirlai Pawl leh remna atana thawktu dang zawng zawng kan chawimawi a ni,” a ti.
Mizoram buaina tawp tura remna thuthlung chu thuthlung tha ber pawl a ni kher lo maithei a nih pawhin, remna