Mizoram Ranking Table Tennis Tournament

Mizoram Ranking Table Tennis Tournament
Mizoram Table Tennis Association (MTTA) buatsaih Mizoram Ranking Table Tennis Tournament chu September 27, 2023 (Nilaini) atang khan MTT Hall, Kawltheihuan, Mission Vengah khelh tan a ni a, minister of state TJ Lalnuntluanga’n he tournament hi a hawng.
Nili chhung awh tur tournament-ah hian category hrang hrang 16 awmin, mens leh womens team a awm bawk a; he table tennis tournament lianah hian Aizawl district-a club hrang hrangte bakah district hrang hrang atangin infiammi an kalkhawm a, Mizo player tha Jeho Himnakulhpuingheta leh Lalthansangi Sailote pawh an inlan dawn bawk a ni.
Tournament hi September ni 30, 2023 Inrinniah a hmawr bawk a ni ang.
MTTA Ranking Table Tennis Championships 2023 hi tun season (2023-24) atana tournament pahnihna niin, a hmasa zawk chu June 28-30 chhunga MTT Hall-a khelh MTTA Season Opening Table Tennis Championship kha a ni.
Tournament pathumna hi MTTA hriatpuinain Aizawl North leh South Table Tennis Association tangkawpin an buatsaih dawn a, organising committee in din tawhin, a hmun leh a hun tur ngaihtuah mek a ni a, kumin chhunga buatsaih tur a ni.
Mizoram Ranking Table Tennis Championship-ah hian district leh club hrang hrang 19 an tel a, category 16, Hopes atanga above 30 singles thleng a awm.
Mizoram player an chetha
September 21-23, 2023 khan 2nd North East Masters Table Tennis Championship 2023 chu India Club Indoor Stadium, Silchar, Assam-a khelh niin, India hmarchhaka state hrang hrang atangin player mi 120 an kalkhawm.
Above- 40+, 50+ leh 60+ ahte mipa leh hmeichhiain single, team leh double-ahte ah inelna neih a ni a; mi pakhat hi category pathum aia tamah a tel theih loh a; Mizoram team hian gold medal pahnih, silver pahnih leh bronze medal pasarih an la.