Mizorama NHIDCL hotu thlakCM-in centre lawmthu a hrilh

Mizorama NHIDCL hotu thlak
CM-in centre lawmthu a hrilh
Mizorama National Highways and Infrastructure Development Corporation Limited (NHIDCL) hotu ber, executive director Virendra Jakhar chu thlak a ni a, a aiah midang dah a ni. Chief minister chuan centre hotute hnenah lawmthu a hrilh.
Lok Sabha MP Richard Vanlalhmangaiha chuan Thawhlehni khan NHIDCL managing director Dr Krishan Kumar chu New Delhi-ah a kawm a. An kawng enkawl NH-306 Vairengte -Sairang inkar a chhiat avanga Mizoram-in harsatna a tawh nasat zia, a bikin Sairang leh Kawnpui inkar a chhiat zual avanga lirthei tlan ngam tawh loh dan a hrilh.
NHIDCL managing director hian kawng chhia chu pawi a tih thu sawiin, technical director Amarendra Kumar chu hna chak leh tluang zawka an thawh theihnan enpui turin Mizorama a tirh nghal thu a lo hrilh a. Chief minister ngen angin Mizoram enkawltu executive director pawh a thar, Adelbert Susngi an ruat nghal tih a sawi a ni.
He kawng siamna atan hian cheng vaibelchhe 50 sanction a nih tawh thu sawiin, fur avanga an thawh chak theih loh thu leh Sairang- Kawnpui inkar pawh thlakhat chhunga thawh zawh an tum thu a lo hrilh bawk.
Mizoram MP hian NHIDCL hotu hi an hnathawhna a hmun ngeia en a, Mizorama kal turin a sawm a. Remchang hmasa berah Mizorama kal a tum thu a lo hrilh a ni.
Hetihlai hian chief minister Lalduhoma chuan sawrkar laipuiin NHIDCL Mizoram Regional Office executive director atana Adelbert Susngi a dah thar avangin Prime minister Narendra Modi leh Road Transport & Highways minister Nitin Gadkari hnenah ziakin lawmthu a hrilh.
Chief minister hian Mizorama National Highway sial hna thawktu bul ber NHIDCL thuneitu sang, executive director, project -in- charge of Regional Office Aizawl Mizoram mawhphurhna chelh turin Adelbert Susngi hi a lo dil tawh a. A hnuah tawngkain a sawizui a. A dil angin centre hian a dah tih a sawi a ni.