MLA Rintluanga thlah liam

MLA Rintluanga thlah liam
Dampa bialtu MLA Lalrintluanga Sailo, July ni 21 zana Delhi-a boral chu Nilaini khan thlah liam a ni.
Thawhlehni khan Delhi aTangin Luangmuala an chenna inah a ruang thlenpui a ni a, a zanah tlaivarpui niin, a tukah an chenna inah amah thlahna hun hman a ni.
Lalrintluanga Sailo hi April thla laihawl vel aTang khan a insawisel a, a khawsik a reh theih loh avangin damdawi inah admit a ni. Typhoid a ni tih hriatchhuah a ni a, Greenwood Hospital-a enkawl a nih hnuah June ni 2-ah Delhi panpui niin, Max Hospital-ah enkawl a ni. Fungal infection a nei tih leh pneumonia a nei tih hriatchhuah a ni. Kar hnih hnua inentir leh turin Aizawlah a haw a, a khua a sik avangin a thisen endik a ni a, rannung seh natna a nei tih hriatchhuah a ni. June ni 29-ah Delhi panpui leh a ni a, Max Hospital-ah enkawl niin, thinlian, mitliam leh sepsis te’n a tlakbuak a, septic shock a nei leh a, damdawi ina enkawl a nih lai hian heart attack a nei e, July ni 21 zan dar 9.02-ah a chawl ta a ni.
Lalnguauva Sailo leh Lalhmingliani te fapa Lalrintluanga Sailo hi 1960-a piang a ni a, a nupui LalbiakThuami nen fa panga leh tu pathum an nei.
1976-ah kum 16 mi niin zalen sual turin a chhuak a, 1986-ah MNF leh India sorkar an inrem thlengin Hnam Sipai-ah a Tang.
MNF party-ah tel zelin politics a luh chilh zui a, 2008 inthlanpuiah a ding a, 2018 leh 2023 inthlanpuiahte Dampa bialah a tling.
A hun chhungin higher secondary school panga a sual chhuak a, kawngpui Tha siamna tur W Phaileng leh Marpara inkar leh Rawpuichhip leh Buarpui inkar te pawh siam a ni. W Phaileng PHC chu CHC-ah hlankai a ni a, Marpara PHC Building thar Tha tak sak a ni bawk. W Phaileng football field-ah amah vang liauliauin Sport Center nuam tak leh Tha tak a lo puitlin theih phah bawk.
Kohhrana inhmang, inkhawm taima a ni a, Luangmual Presbyterian Kohhranah thuhriltu, Puitling Sunday School zirtirtu, Building Committee member a ni mek.
Amah thlahnaah mi pawimawh tak tak an tel a, mipui Thahnem takin an thlah liam a ni.