Mizoramah BMP Day hmang

Mizoramah BMP Day hmang
Mizoram Baptist Mipa Pawl (MBMP) chuan May 4 khan an din champha vawi 43-na an lawm a; chhun leh zan lam programme an hman bakah Day pual hian BMP Unit hrang hrangin an awmna kohhran dinna veng leh local council huamchhungah vantlang tana thil tha tiin (social work) hun an hmang a, thilpek an pe bawk.
BCM Durtlang Leitan hnuaia Fellowship department pakhat Baptist Mipa Pawl (BMP) pawhin Ningani zing khan MBMP duhdan tihlawhtlingin, Leitan (Silchar road) atanga Bawngkawn lam chhukthlaka Leitan huamchhung chin tawpnaa C. Lalthanpuia motor silna hmun thlengin kawngpui kam hnawk an thianfai.
BMP Durtlang Leitan Unit hian YMA Leitan Branch hnenah an Day lawmna atan bawngtuthlawh leh suahdur an hlan bawk.
BCM Durtlang Leitan hnuaia Fellowship department dang, Baptist Kohhran Hmeichhe Pawl (BKHP) pawhin BKHP Day vawi 85-na pualin May 2 khan YMA Leitan Branch leh YMA Durtlang Branch hnenah suahdur pakhat ve ve an lo pe tawh a ni.
Hei bakah hian BCM Durtlang Leitan hnuaia fellowship department – Thalai Kristian Pawl (TKP) chuan April 24 zan khan Leitan thlanmualah thlankhur pakhat an lai a ni.