Mizoramah hydroelectric power plant lian deuh din tum dawn

Sawrkar laipuia Ministry of Power secretary Alok Kumar chuan Mizoramah kawlphetha siamchhuah belhna turin hydroelectricity power plant lian deuh din turin kawng zawn a ni dawn tih a sawi.
Mizorama Power & Electricity department hnathawh enpuia lokal Ministry of Power secretary Alok Kumar chuan Inrinni khan Raj Bhavan-ah larsap Dr Hari Babu Kambhampati a hmu a. Mizorama luiluang hmanga kawlphetha siam chung-chang leh a kaihhnawih thil pawimawh a sawipui.
Power secretary chuan state Power & Electricity aiawh secretary hoin engineer -in-chief leh a hnuaia engineer-te nen an inkawm tih sawiin, an sawihona eng atangin Mizoramah kawlphetha siam belhna atan hydroelectricity power plant lian deuh din tura kawng zawn a ni dawn tih a sawi a. Hydel plant te deuh din chu thil tih chi nia a hriat loh thu a sawi. Hydel Project te tham deuh, megawatt 200 chin tal loah chuan eng chhit man, unit khatah cheng tam tak chawi a ngai a, a fuh lo, tia sawiin, “Hydro power plant kan din dawn a nih chuan Mw 200 chunglam kan en a ngai a. Hetiang pechhuak chinah chuan unit khat hralhna man a chawitu tan a ziaawm deuh. Chutiang chu state official-te nen sawi ho a ni,” a ti.
State P&E hotute chu an vengva in project liantham enkawl turin experience an nei tha tawk nia a hriat thu a sawi bawk.
Larsap chuan Power secretary rawn kal chhan chu Mizoram tana thil pawimawh ber zing ami a ni tih lo hrilhin, state-in kawlphetha tam tham tak siam theihna tur lui luang nei mah se, sum lamah harsatna a tawh avangin kawng dang dapin Union Power minister a hmu thin tih a sawi a. Power siam kawngah hnathawh theihna a nih dawn chuan Central PSU sawm luh mai a finthlak thu leh thil tul dangte pawh state Power minister leh official-te a sawipui fo tawh tih a sawi.
Central Power secretary thil hmuh dante zawtin, engemaw ti kawng tala Mizoramin power siamchhuah belh dan kawng zawnpui turin a sawm a. State-in kawlphetha hman tur khamkhawp a neih hunah chuan thil siamchhuahna hmun tam tak a awm belh anga, state revenue pawh a pung dawn tih a sawi a ni.