Mizoramah kum 13-15 inkar 58% in vaihlo leh a kaihhnawih an khawih

Mizoramah kum 13-15 inkar 58% in
vaihlo leh a kaihhnawih an khawih
Global Youth Tobacco Survey-2 tarlan danin Mizoramah kum 13 leh 15 inkarah zaa 58 chuan vaihlo leh a kaihhnawih an khawih tawh.
Lunglei district-a thalaite zuk leh hmuama an fihlim theih nana beihpui thlakna ‘Tobacco Free Youth Campaign 2.0’ chu Ningani khan Lungleiah addl DC James Miahlung chuan a hawng. Global Youth Tobacco Survey-2 tarlan danin Mizoramah kum 13 leh 15 inkarah 58% in vaihlo leh a kaihhnawih an khawih tih a sawi a. National Family Health Survey-5 tarlan danin, Lunglei district bikah mipa puitling kum 15 chunglam zingah 75%-in vaihhlo leh a kaihhnawih an khawih laiin, hmeichhe puitling zingah 62%-in an khawih bawk tih a sawi.
Ruihhlo ngai leh ngawlvei tam ber chu tleirawl laia vaihlo leh a kaihhnawiha fihlim lo an nih avangin ngaihthah chi a ni lo tih sawiin, taksa hrisel nei turin vaihlo leh a kaihhnawih laka fihlim bakah taksa sawizawi tam a pawimawh tih a sawi a ni.
Thusawitu dang Dr Noel Lalremruata Sailo chuan inkai chhawn theih loh natna (non-communicable disease -NCD) chungchang a sawi zau a. NCD natna hrang hrang – cancer, zunthlum, lung leh thisen zam natna, BP sang, heart attack, stroke leh a dangte thlen chhan tam ber chu vaihlo a ni tih a sawi a ni.