Mizoramah SIR kalpui tan dawn

Mizoramah SIR kalpui tan dawn
Election Commission of India chuan a bik taka electoral roll ennawnna – Special Intensive Revision (SIR) thawh thumna neih a nih tur thu a puang a. Hetah hian Mizoram tiamin state 16 leh union territory 3-ah neih a ni dawn. Chief electoral officer Mizoram Dr Lalrozama chuan SIR neih tur tur thu Ningani tlai khan Aizawla thuthar thehdarhtute hmaah a puang a. Mizorama intensive roll revision neih hnuhnung ber chu kum 2005 kha niin, kum 20 liam hnuah ‘Special Intensive Revision’ neih a ni leh dawn ta tih a sawi a. Hei hi kalphung pangngaia electoral roll ennawn thin ang niloin, a aia thuk leh changtlung zawka neih tur a ni tih a sawi.
Booth level officer (BLO) tin ten enumeration form nen chenna in tin an tlawh anga, electoral roll thar hlak siam tur a nih avangin voter zawng zawngin ngaihpawimawh hle a tul, tiin, kalpui hun tur – May 30 leh June 28 inkarah hetiang mi lo dawngsawng thei tur in nghak indah ngei tur leh sawi buai theih awm thei chi ang phei chu a buaipuitute lo hmachhawn theia awm ngei turin an inchah lawk tih a sawi a ni.
CEO sawi danin, SIR-ah hian kum 2005-a Mizorama intensive revision neiha electoral roll leh kum 2025 electoral roll enmil a ni dawn a. BLO-te hian kum 2005 roll-a awm tawh leh la awm lote endikin, 2005 electoral roll-a chuangte chu an fate leh an thlahte awm leh awm loh nen an enmil hnuah thlunzawm (map) a ni. 2005 electoral roll-ah hian voter 559123 awmin 2025 e-roll ah voter 875004 an awm thung a. 2005 leh 2025 e-roll enmil a, percentage of self and progeny (e roll-a hming chuangte leh an thlahte) mapping tihhlawhtlin zat chu 80.37% a ni.
Langtlang leh rintlaka SIR hi kalpui a nih theihnan ECI chuan political party tin an tel ve a ngaipawimawh hle tih sawiin, party aiawh tur – block level agent inruat tura tih an ni a. AAP tih loh BLA tur thehlut tawh zingah BJP -294, INC – 1045, MNF – 868 leh ZPM -1223, an vaiin BLA 3430 ruat an ni tawh tih a sawi.
SIR-ah hian 2026 July 1 chu qualifying date-ah hman tur a ni a, kumin July 1-a kum 18 tling hman chu roll-ah thun an ni dawn. May 30 – June 28 chhungin BLO tinin an huamchhung in tin tlawhin hriat tur leh dahkhah ngai an dah khat ang.
July 5-ah draft electoral roll hi tarchhuah a ni anga, July 5 – August 4 inkar chungin sawi leh sel duh nei tan hun hawn a ni ang. August 5 atanga September 2 chhungin henga thu thlen hi chinfel a ni anga, final electoral roll hi September 6-ah tlangzarh tum a ni.
CEO chuan mobile app -ECINET download turin mitin a ngen a. He app hmang hian 2005 intensive revision-ah voter-ten an hming a chuan leh chuan loh an en thei a. Hei bakah hian BLO phone theihna, complain thehluhna, application thlen chin chhuina (track) leh thil dang chhawr theih a awm tih a sawi a ni.