Mizoramah zaa 6 velin zunthlum vei

Mizoram pumah mi 100-ah mi 6 vel zelin zunthlum (diabetis) an nei a, zuntlum nei tam ber chu ei leh in fimkhur tawk loh vang leh nunphung uluk loh vang a ni tih sawi a ni.
Mizoram Diabetis Society (MDS) Gen. Hqrs. chuan Zirtawpni khan Aizawlah annual general meeting an nei a. Hmanpuitu National Health Mission Mizoram mission director Dr R Lalchhuanawma chuan, zunthlum vei avanga thi hma tura indah ngawt tur a ni loa, insum ngai leh eitur tha erawh kan eia kan tih a ngai tih a sawi. Mizoram pumah mi 100 zela mi 6 vel zunthlum vei ang kan ni a, India ram hriselna lam tehnaah kum 15- 49 inkarah hmeichhia 100 zela 5, mipa 100 zela 7 zunthlum nei kan awm tih sawiin, kan ei leh in fimkhur tawk loh avang leh nunphung kan uluk loh vang a ni ber tih a sawi.
“Tunlaia natna kan vei nasat em em, natna inkaichhawn theih loh – zunthlum, thisen sang, heart attack, stroke adt kan tihah NHM hnuaia programme pakhat NP-NCD (National Programme for Prevention and Control of Non-Communicable Diseases) in heng natna kai/ vei hmaa inven dan turah nasa takin hma a la a. Kan hriselna hi kan kutah a awm a, inthlahdah loa kan nun uluk a pawimawh,” a ti.
Civil Hospital Aizawl dietician Margaret Lalremruati chuan, hriselna atan ei tur tha ei dan chungchang a zirtir a. Diabetis veite inenkawl dan tur sawiin, inven dan tur dik a kawhhmuh bawk. Kan hrisel zawkna atan thlai hring lam ei uar a tul tih sawiin, “Hriselna atana pawimawh em em chu a tawk chiaha chaw ei a, taksa insawizawi that a ni. Pathianin a hun min pek, mut hun leh thawh hun dik taka hman a pawimawh a, kan taksa peng hrang hrang hi duat a tul,” a ti.
Mizoram Diabetis Society chu 2009 April 13-a din a ni a, tun thlengin member 1096 an inziaklut tawh a, heng zinga 209 chuan chatuan ram an pansan tawh.