MJA-in I&PR Director thlahna leh Director thar lawmpuina hlan

MJA-in I&PR Director thlahna leh Director thar lawmpuina hlan
MJA General Headquarters chuan Zirtawpni khan I&PR director kalchhuak C Lalnunkima thlahna leh director thar K Vanlalsangi lawmpuina an hlan.
Aizawl Press Club Conference Hall-ah MJA treasurer Lalrinmawia Sailo kaihhruaiin hun an hmang a, MJA president C Lalrambuatsaiha’n director kalchhuak C Lalnunkima hnenah ngaihhruaina thuziak a hlan a, director thar K Vanlalsangi hnenah lawmpuina thuziak a hlan bawk.
MJA president-in thu a sawi a, sorkar hnathawk tam tak zingah an pension hun nghak chhuak zo lova thi engemaw zat an awm karah Pu C Lalnunkima’n pension thlenga a hna tluang taka a thawk thei chu a lawmpui thu a sawi a, I&PR director a nih chhunga MJA nen thawh hona tha tak an nei chu lawmawm a tih thu sawiin, a kal zelna turah duhsakna a hlan. Director thar K Vanlalsangi a lawmpui thu a sawi a, ram rawng a bawl zelna turah duhsakna hlanin, ram leh khawtlang tan theihtawp chhuah turin a ngen. Tunhma atanga I&PR leh MJA te’n thawh dunna tha tak an neih chu a kaihhruaina hnuaiah an chhawm nun zel a beisei tih a sawi.
I&PR director kalchhuak C Lalnunkima chuan MJA-in ngaihhruaina hlana amah thlahna hun an buatsaih chu a lawmawm a tih thu a sawi a, I&PR department-ah kum 38 leh thla 10 a thawh chhung leh director hna kum 3 leh a chanve a thawh chhunga MJA nen thawh hona tha tak an neih avanga lawmthu sawiin, Pathian malsawmna dawnga pension thlenga a thawk thei chu malsawmna ropui tak a ni tih a sawi.
I&PR Director thar K Vanlalsangi pawhin director mawhphurhna a lak chhungin MJA nen thawh dunna tha tak an neih a beisei tih a sawi a, thawh hona tha an neih loh chuan an chak thei dawn lo tih sawiin, a mawhphurhna lenchhuak tura theihtawp chhuah a tum thu a sawi.