MKHC-in vote chhiar ni ah punkhawm huaihawt loh ngen

Mizoram Kohhran Hruaitute Committee chuan Election Commission-in vote chhiar nia a ruat tlang tak December 3 (Pathianni) ah mipui punkhawm huaihawt lo turin kohhran member-te a ngen.
Mizoram Kohhran Hruaitute Committee (MKHC) hian thuchah siamin, MLA thlana vote chhiar hun atana ruat December 3 chu Pathianni a nih avangin a hun hi Pathianni emaw Inrinni (Sabbath) emaw ni lo, hun dang ruat tura ngenna MKHC, NGO hrang hrang leh political party zawng zawngten ECI hnena an thlen chu tun thlengin awmzia a la nei lo tih a sawi a. NGO Coordination Committee hruaituten chief election commissioner hmu a, vote chhiar hun sawn tura ngenna hmaichhana an sawipui chung pawh a, ECI hnen atanga chhanna a la awm lo chu pawi a ti takzet tih a sawi a ni.
Hei vang hian, vote chhiar hun hi sawn a nih loh chuan, December 3 (Pathianni) hian Pathian biak inkhawm bak chu khawi hmunah mah mipui punkhawmna buatsaih lo turin Mizoram mipui zawng zawng a ngen tih MKHC hian a sawi.
December 3 chu Pathianni a nih avangin political party office-te pawh nilenga hawng lo turin a ngen tih MKHC hian a sawi a. ‘Kan hnam leh kan sakhua a lo him a, sakhaw zalenna kan neih zel theih nan Mizoram mipui zawng zawng tangrual sauh sauh turin tih takzetin kan ngen a ni,’ a ti.