MLA inthlanah Congress an nil ka hlauhpui – Dr L Thangmawia

MLA inthlanah Congress an nil
ka hlauhpui – Dr L Thangmawia
Kumin kumtawpa MLA inthlanpui neih turah Congress party chuan MLA pakhatmah nei loa an nil a ring tih MNF Thalai president Dr L Thangmawia, MLA chuan a sawi.
Zirtawpnia MNF office Mizo Hnam Run inkhawmah Dr L Thangmawia chuan central-ah Congress party an tho leh mai rih dawna a lan loh thu a sawi a. Kumin February-a hmarchhak state pathum inthlanah pawh Nagaland-ah an nil a, Tripura-ah seat 3 la in Meghalaya-ah seat 5 an la tawk a. Mizoram inthlanah pawh Congress hi an nil mai ang tih hlauhthawnpui awm tak an ni, tiin a sawi.
ZPM chu anmahni phur phura phur viau, an din hnu reiloteah rawng hran hrana inlan nghala Mizo mipui hnena inzuar an ni tiin, “An bultannaah chuan movement intiin, party politics ngaihnep hmel takin bul an tan a, kalphung thar chu itawm takin, engchi ah nge a nih mipui hrilhfiah si loin an zuar mek reng a, tunah chuan an sawihnawm thin kawng kha an zawh chho leh mek zawk a ni,” a ti.
ZPM MLA te chu ZPM sawrkar kaldan tur hlimthla tilang mektu an ni tih MNF Thalai president hian sawiin, “An ni atang hian kalphung thar an kalpui loh tur zia a lang a, Val Upa Council engahmah an ngaih loh zia leh lo sawrkar palh ta hlauh pawh nise, kalphung hlui tho a takah chuan an kalpui dawn tih a thibeh ho atang hian a lang a, mipui sawrkar an tih fo pawh hi an MLA-ten an fund an hmanna kan hmuh theih chinah hmuh tur a awm lo,” a ti.
Sawrkar hmasa hnathawh bak engemawzat MNF sawrkarin a thawk zawm tih sawiin, tun sawrkar chhunga sum harsatna an tawh zawng zawng chu an sawi harsat chawp a ni loa, a takin a harsa tak tak tih a sawi a ni. “Sawiselna tam tak karah rilru lam en thintu kan Pathian hian hneh takin sawrkarna min pe leh ngei dawn tih ringhlel lo ang u,” a ti.