MLA leh MDC nih kawp theihna dan Supreme Court-in a hnawl

High Court-in Member of Legislative Assembly leh Member of District Council a ruala nih kawp theih tura thutlukna a lo siam tawh chu Supreme Court-in a hnawlsak.
Supreme Court advocate on-record JC Lalnunsanga’n hemi chungchang a sawi danin, kum 2024 khan Chakma Autonomous District Council (Constitution, Conduct of Business etc) (Amendment) Rules 2003 chu India Danpui kalh nia hria in Gauhati High Court Aizawl Bench-ah Doymoy Daveng Chakma leh Rustom Chakma ten PIL an thehlut a. Thubuai thehluttute hian CADC leh MLA office chelh kawp theih lohna dan awm thin, paihthlakna dan siamthat thar – Rule 4 of the 2003 amendment an khing.
He thubuaiah hian Chakma ADC MDC (chief executive member) Rohan Mohan Chakma chuan 36-Tuichawng Assembly constituency-a MLA a nihna nen office a chelh kawp a. India Danpui Article 101 leh Article 190 chuan Parliament leh state legislature-a member nih kawp chu a phal loa, Danpui innghahna hi District Council-ah pawh hman tur a ni, tih chu an tanchhan.
Hei bakah hian Prohibition of Simultaneous Membership Rules 1950-ah innghat telin, 2003 amendment chu 2002 CADC Rules hmasa in a khap thin, office pahnih chelh kawp theih lohna chu a paihthlak avangin Danpui kalh a ni tih an thlen a. PIL-ah hian he amendment bakah CADC office leh MLA office chelh kawp RM Chakma chu disqualify turin an ngen a ni.
State sawrkar chuan Danpui 6th Schedule (Autonomous District Councils) hnuaiah District Council leh State Legislature-a member nih kawp theih leh theih loh chungchang tarlan a ni lo tih tanchhanin, Election Commission-in Article 191 hnuaia MLA-te paih thlak theihnaah Autonomous District Council (ADC) a member nih chu paihthlak theih nia sawi a ni lo tih a zsawi bawk.
Gauhati High Court thutlukna lo siam tawh, Hiphei vs State of Mizoram (2013) chu tarlangin, hetah hian Court chuan member thlantlinte leh Autonomous District Council CEM chuan ‘office of profit’ an chelh loa, Assembly election chu ADC member an nihna atanga bang kher loin an tel theh tih a lo sawi tawh tih chu an tanchhan bawk.
Gauhati High Court-a he thubuai ngaihtuah a nih hian, Article 101 chuan Parliament leh State Legislature-a member nih kawp a remti loa, Article 190 chuan legislature pahniha member nih kawp phal lo bawk mah se, he Article pahnih hian ADC lam awm dan tur a sawi tel lo thung, tiin, Sixth Schedule chu hemi chungchangah chuan a ngawi tih an sawi. India Danpuiah hemi chungchanga ‘khapna dan’ tarlan a nih loh avangin court hian danpuia thu inziakah thu emaw dan emaw a belh thei lo tih a sawi a ni.
Dual membership hian buaina a siam theih a awm thu sawi mah se, hemi atanga zawhna awm thei chu, legislature emaw dan siam tura thuneitute kut a awm a ni a, court tih theih a ni lo tih sawi a ni.
PIL hi titawpin Gauhati High Court hian Rule 4 of the 2003 amendment chu a valid thu leh CADC member leh MLA nih kawp theihna chungchanga khapna dan a awm loh thu a sawi a ni.
Thubuai thehluttu Rustom Chakma hian CADC member leh MLA member nih kawp theih lohna dan awm thin an paihna Amendment hi Supreme Court-ah a khinglet a. Supreme Court hian Gauhati High Court thutlukna, ADC member leh MLA nih kawp theihna hi a hnawl ta a ni.
Member nih kawp theih lohna dan an siam danglam tawh hnu chu ngaihtuah tha leh turin CEM Chakma Autonomous District Council chu a hriattir aMLA leh ADC member member nih kawp theih lohna,Rule 11 hmasa zawk, thla thum chhunga ngaihtuah a, thutlukna siam turin a ti bawk. Hemi chhunga an siam tha lo a nih chuan thubuai thehluttute hi Supreme Court-a zualko leh a phalsak a ni.
Supreme Court hian 6th Schedule hnuaia awm ADC chu huang khata awm tura a ngai tih pawh sawiin, member nih kawp theih lohna hi LADC-ah chuan hman reng a la nih laiin, amendment-ah hian CADC leh MADC-ah paih thlak a ni. Hei hi Supreme Court chuan dik theiin a hre loa, CADC leh MADC ten hemi chungchanga an thutlukna an siam zawhah, amendment neih hmaa member nih kawp theih lohna dan – Rule 11 of CADC 2002 chu hman leh theiha hmala turin Supreme Court hian a ti bawk.
LADC-in dan a siam thar, Lai Autonomous District Council (Constitution, Conduct of Business etc) Rules 2010 ah chuan, ‘MLA’ tih hi a paih ve tak avangin, an dan siam tharah chuan ADC dang pahnih ang tho hi a nih hmel tih thu dawn a ni.