MLA-ten eng percent mah kan la lo ang – AAP

Minister leh MLA an nei a nih chuan hmasawnna hnathawh atang leh thildang reng rengah eng percent mah an la dawn lo tih Aam Aadmi Party chuan an sawi.
AAP Mizoram hruaitute chuan corruption chu ram hmasawn theih lohna bul ber leh ramin hma a sawn theihna’na do ngei ngei ngai a ni tih sawiin, party hrang hrangin corruption do an tum tih sawi mah se, hmalak an tum dan sawichianna an nei lo vek tih an sawi.
Tunhnaia national paper pakhatin India ram state-te zirna kaihhnawih hrang hranga state dinhmun a tarlan zingah a hniam ber zingah Mizoram kan awm chu zahthlak an tih thu an sawi a. Sangaua zirlaiten zirtirtu chungchangah nawrh an huaihawt chu pawi an tih thu sawiin, zirlaiten zirtirtu dila sawrkar an kar chu sawrkarin zirlaite zirna a ngaihsak loh zia a tichiang hle tih AAP Mizoram hruaitute hian an sawi. Education hotuten zirna in Mizoramah hma a sawn, tia an sawi thin dik loh zia nemnghettu a ni tih an sawi bawk.