MNF atanga chhuak politics-a ding chhuak an awm lo – Lalthlengliana

MNF vice president Lalthlengliana chuan an party atanga chhuak reng reng politics-a ding chhuak zui an awm lo niin a sawi.

Ningania MNF office Siahaa ‘woker’s meet’ neihah MNF vice president chuan an party atanga chhuak politics-a ding chhuak an awm loh thu hi sawiin, “Pu Lalduhhom ZMP leader-in MNF a chhuahsan hnuah kum 35 politics a hlawhchham pui a; Congress president Pu Lalsawta pawh MNF-ah kan MLA lo ni tawh, BJP president hi kan party-ah joint secretary lo ni tawh, candidate chan loh avanga BJP-a lut a ni. MNF atanga chhuakten an hruai ZPM, Congress leh BJP-te hian sawrkarna an siam ngai loang,” a ti.

Tunhnaia Siaha-a MNF atanga bang ta te a hmuna kalchilh leh banna thehluh document a zirchian hnu ah social media-a an lo hmuh ang ringawt niloin MNF bansantute hi a takah an tlem hle tih a sawi. Banna thehluttu tam ber chu MDC inthlan laia an party phatsantu leh party enrollment-a an telh loh, an hnawhchhuah sa an ni tih sawiin, “Min eptu tlemtein kan party beih nan, mipui tih chiai nan thudik tawk lo an vawrhdarh mai mai a lo ni,” a ti.
Siaha-ah MNF an la tam filawr ber a, 2023 MLA inthlanah Siaha-ah leh Zoram pumah MNF an tling leh dawn tih a sawi bawk.

MNF beihna atan mi thenkhatin fin kherek chhuaha video tidarhin, document belhchian dawllo nen an bei tih Lalthlengliana hian a sawi. “Nimina Siaha Bazara vantlang inkhawm kan neih pawh police-te venhimna dil angin min lo sawi a. Police-te kha MSO (zirlai) ten Siaha DC sawn rih lo tura an duh avanga picketing an neihnaa duty-te an ni. Social media kan hmangsual thin hi a pawi a, mipui hian thudik hriatchian hma chuan rilru sukthlek tihdanglam zung zung nan hmang lo ang u,” a ti.