Tlin an tum luatah ram tan pawi an khawih zel – Congress thupuangtu

Tlin an tum luatah ram
tan pawi an khawih zel
– Congress thupuangtu
ZPM chuan engti kawng pawha tlin a, thuneihna chan an tumna lamah ram tan pawi an khawih tih Congress thupuangtu chuan a sawi.
Thawhtannia Congress Bhavan-a inkhawmah MPCC thupuangtu Lalremruata Renthlei chuan, ZPM sawrkar siam dan system, “short-term gain, long-term loss” an tih hi ZPM vekin an huat em em nia an sawi thin niin, an huat tak chu an kalpui mek thung tih a sawi.
“Sangha mantuin thir zum fei kibar dawlh tura sa them hmanga sangha an thlem ang hian, mipui it zawng kalphung thar tiamin an thir zum feikibar min dawlhtir a ni,” a ti. Chu chu an insawi anga kawngpui siam a nih loh danah leh sawhthing lei an harsat danah a lang tih a sawi.
Mizoramah kuthnathawka ei zawng an tam ber laiin, kuthnathawktute leh thingtlang mite hmasawnna atana mipui hne hnai department – Agriculture, Horticulture, Land Resources Soil & Water Conservation, Rural Development leh Education-ah nikum aiin budget-ah sum an dah tlem zawk vek niin Lalremruata Renthlei hian a sawi.
“Heng kan sawilan hi mipui awmna tak tak, mipui hne department an ni a, mipui hne zual budget tihtlem hi kalphung thar chu a ni mai a, a tuartu tur chu mipui bawk an ni,” a ti.
Kalphung thar sawrkarin mitlemte hlawkna, mi tam tak tana beidawnna kawng a zawh mek tih Congress thupuangtu hian sawiin, “Sawimam loin, an ti ang an tih, an tiam tihlawhtling turin kan phut a, chu chu mipui laka an bat a ni,” a ti.