MNF hruaitu in mipui ngaihdam dil

MNF hruaitu in mipui ngaihdam dil
MNF sawrkar chhunga an tih dik loh zawng zawngah MNF hruaitu Dr R Lalthangliana chuan Zoram mipui hnenah ngaihdam a dil.
Thawhtannia kum 2025 atana Siaha District MNF office hawnna inkhawm a hmanpuinaah MNF senior vice president Dr R Lalthangliana chuan, MNF sawrkar khan Zoram hmasawnna atan theihtawp a chhuah a, an kut hnu tam tak a awm a, CM hlui Pu Zoramthanga khan Zoram hmasawnna a ngaihtuah a, engemaw hleka sawi hnawmna tur zawng awm thin mah se, MNF ministry Pu Zoramthanga hruai khan rilru leh tihtakzetin hna a thawk tih a sawi.
MNF-in Zoram a kaihhruai chhung khan tih fuh tawk lote a awm ngei a rin thu leh a bikin District Council an enkawl dan pawh duhthu a sam hauh lo tih an pawm tih sawiin, “Mipuiin MNF sawrkar thar an pek leh thuai ka beisei a. MNF hruaitu ka nihna leh sawrkara minister ka lo nih tawh angin Zoram mipui hnenah kan sawrkar chhunga kan tih dik loh zawng zawngah ngaihdam ka dil a ni,” a ti.
Kan sawrkar hrawn mek party-in opposition an nih lai khan Mizorama sawrkar tawhte chu archuktuiloin an chhuah vek a. Engmah tih ve nei lo, nuam tawl satliah mai maiah an chhuah thin tih Dr R Lalthangliana hian a sawi. Zoram mipuiah beisei tharna ‘kalphung thar’ an tiam a, an duhthusam apiang duang chhuakin mipuiah an inzuar a, chu kalphung thar chu mipuiin kan lei ta a, han belhchian chuan a seal pack chu ISI mark chuang lo a lo tam si a, mipuiin han kir leh dawn ila, a man kan lo pe leh laklawh si a, lungsi lo taka kawl an lo ngai ta tih a sawi.
“Lei nawn leh an tum tawh lo tih hi sawrkar hnathawk, neutral leh kohhran ho han titi pui hian a hriat hle. Tun sawrkar hi kum khat leh thla hnih a kal tawh a, state budget bak cheng khatmah pawh chhuah reng reng an neih kan la hre lo. A kotlang atanga inkhelh dan leh ball pet dan thiam taka sawi thin ho khan field chhunga full uniform nen an han luh meuh chuan an arkhawthim dai chu a nih hi,” a ti.
ZPM sawrkar chu sawisel hran a ngai loa, anmahni inzawrhna an thu leh video clip nen an inkhing tawk chauh tih a sawi bawk.