t-ah chuan, “Vawiin hian thian duhawm tak, ka kutchhuak ropui tak: a rimawi te min hnutchhiahtu chu kan mangtha ta. Thinlung kehsawm chungin Tina Turner mual liam thu kan puan a tul ta si. Ka thinlung chhungril ber atangin a chhungte kan tawrhpui tak zet a ni. Tina, kan va ngai dawn tah che em,” tiin a inziak. Khawvel rimawi arsi lian zing ami, a aw chak leh mawi danglam tak, a performance hmuhnawm em em mai bawk si, Tina Turner, kum 83, thih thu chuan khawvel a deng chhuak rang ngei mai.
Warner Music pawhin thuchhuah an siam nghal thuai a, “Warner Music chhungkua chuan mi bik Tina Turner thihna hi kan tuar tak zet a ni. Khawvel huap icon, kawng sialtu ropui, a aw mawi danglam tak atanga tunge a nih hriat nghal theih, mite entawn a ni. Khawvela ropui ber te zinga mi a ni. Award chhiar sen loh dawngin, a album maktaduai 180 chuang hralhin, a tour-in record siam thinin, lemchan lamah pawh theihnghilh theih tawh loh tur te pawh a lo chang tawh mah se, Tina hi chu a rimawi ngaihnawm tak avanga hriat reng a ni zawk ang. A that danglamna ropui tak leh khawvel a hip hnehna hian chhuan tam tak lo la awm thlengin nghawng a la nei zel dawn a ni,” an ti ve bawk.
Tina Turner hian 2014 khan a album hnuhnung ber ‘Love Songs’ a tichhuak a, chumi hnuah rimawi a chawlhsan ta a ni. Rimawi khawvelah kum 50 chuang a inhmang a, zaithiam tam tak te entawn leh a hnung an zui a ni a, chung zingah chuan Janis Joplin atanga Beyonce thlengin an tel a ni. Soul singer atangin pop khawvelah a pakai a, Grammy Hall if Fame-ah pawh a hla pathum ‘River Deep – Mountain High,’ ‘Proud Mary’ leh ‘What’s Love Got to Do With It’ te chu seng luh a ni tawh a, amah ngei pawh Rock and Roll Hall of Fame-ah lakluh ni tawhin, Kennedy Center honoree a ni bawk a, rock musical Tommy-ah Acid Queen role a lo chang tawh a, Mad Max Beyond Thunderdome-ah Mel Gibson chang dunin, Aunty Entity lemah a lo chang tawh bawk.
1986-a a lehkhabu ziah “I, Tina’ chu lehkhabu hralh kal tak niin, he autobiography-ah chuan a naupan lei leh a hlawhtlinna kawng, a pasal Ike nena an chanchin, in chhunga tihduhna a tawh thin dan leh Buddhism-a a inlehna chhan te a tarlang a. 1984-a a album ‘Private Dancer’ album avanga a rawn lar chhuah leh dan te leh, a hla hit ‘What’s Loive Got To Do With’ chungchang te pawh a tarlang. He hla avang hian Tina hian Grammy Award pawh pathum dawngin, chung zingah chuan record of the year, leh song of the year pawh a tel a, Tina hian a rimawi career-ah Grammy pariat a dawng hman a ni. He hla hi Tina Turner biopic, Angela Bassett leh Laurence Fishburne te channa title atan an hmang zui ta nghe nghe a ni.
Tina Turner hi a laiah hming chu Anna Mae Bullock niin, November ni 26, 1939-ah Nutbush, Tennessee-ah a puang a, unau pahnih zinga a naupang zawk niin, a hnathawhna cotton farm-ah te a thawk ve lawp lawp a, an khaw Baptist biak inah te a zai ve thin. A tleirawl chhuahin St. Louis-ah an pem a, chutah chuan a nuin a hmeithai pui a, he khuaah hian a pasal Ike nen an intawng ta a ni. Ike chu guitarist niin, an band Kings of Rhythm chu Club Manhattan-ah an zai thin a, chu chu remchangah lain, Bullock pawh zan khat chu band ho bulah a zai ve a, chuta tang chuan khawvelin a hriat larna Tina Turner hming a rawn pu tan ta a ni.
A pasal Ike nen Ike & Tina Turner Revue an din a, a stage performance a hmuhnawm a, a aw a mawi danglam bawk nen, 1960-ah chuan R&B chart-ah top 10-a lang thei hla an nei nual tawh a, chung zingah chuan ‘A Fool in Love’ tih hla pawh a tek. 1966-ah rock film The Big T.N.T-ah a inlan a, chuta tang chuan film musical director Phil Spector-a’n a ngaihven ta riau a, hemi kumah vek hian Phil chuan ‘River Deep, Mountain High’ sak tirin, rimawi khawvelin a hmelhriat tan a. Hetihlai hian Las Vegas-ah an show an nei thin a, David Bowie, Cher, James Brown leh Elvis Presley te nen an inhmelhriat tan ta a ni.
Label hrang hrang-in an hnuaia awm turin an sawm ta sup sup a, Rolling Stones concert-ah te opening act neiin, chutah chuan CCR hla ‘Proud Mary’ a cover a. A aw mawi danglam tak mai chuan muang changa sa tanin, a sa rang telh telh a, he hla avang hian rimawi khawvelah a hming a chher nasa lehzual ta a ni. 1971-a hla lar ber te zinga niin, Grammy Award pawh best R&B vocal performance by a group an dawn phah hial a ni. Rock and Roll Hall of Fame-ah 1991-ah lakluh niin, Ike & Turner te hian 1960 atanga 1975 thlengin hla hit tak tak 20 chuang an nei hman a ni.
A pasal Ike nen an inthen hnuah solo lamah a kal leh ta a, cabarat show hrangf hrang hrangah a inlan a, 1980-ah veteran manager Roger Davies hnuaiah a inziak lut ta a ni. Chutah a aw chak zet mai chu rock lehzuala kalpuiin, Al Green hla ‘Let’s Stay Together’ a cover chu a larpui hle a, solo anga US-ah a hla hit hmasa ber a ni ta a ni. Chumi lawkah a album ‘Private Dancer’ a tlangzarh a, hei hian rimawi khawvelah a vawrh lar ta takzet a ni. 1984-ah chuan Grammy a dawn phahna hla ‘What’s Love Got to Do With’ leh ‘Better Be Good to Me’ tichhuakin, chart No.3 te a hawlh ta ve zak zak a ni.
Tina Turner hi pawnfen chhing fengin, high heels dum nen stage-ah a ke a’n theh kual vel thin leh a sam an thing vel thin te chu hmuhnawm tham a ni a, a hunlai tour atanga sum lalut hnem record te pawh a siam fo, a tour hnuhnung ber chu Tina!: 50th Anniversary Tour kha niin, 2009-a a neih a ni a, he tour-ah hian show vawi 90 zet a nei a ni.
Recording leh tour kar lakah lemchan lamah pawh a inhmang thuk viau a rock musical ‘Tommy’-ah Acid Queen lemah a chang a, 1985 Mad Max Beyond Thunderdome-ah Aunty Entity lemah changin, 1993-ah Last Action Hero-ah a inlan a, 1995-a James Bond film ‘GoldeEye’ film theme song U2 hla phuah ‘GoldenEye’ satu kha a ni bawk.
Billboard Hot 100 chart-a lang thei solo hit 17 neiin, a solo album Break Every Rule leh Foreign Affair bakah a compilation album All the Best te pawh a hit hle a, 1999-a a album Twenty Four Seven chu a studio album hnuhnung ber a ni ta a ni.
2005-a Kennedy Center Honors chawimawina a dawn tumin Oprah Winfrey, Beyonce, Melissa Etheridge leh Al Green ten a pualin hun an hmang a, hemi tum hian Beyonce-i’n ‘Proud Mary’ sain, Tina Turner chetdan ngei maiin a rawn che a, Beyonce performance-ah pawh a hmuhnawm ber pawl a ni zui ta bawk. 2008-ah Beyonce leh Tina Turner te hian ‘Proud Mary’ hi an sa dun leh nghe nghe a ni. Tina hi kum 73 mi a nihin, Vogue German issue cover-ah a lang a, Vogue cover-a lang thei upa ber a ni bawk.
July 2013-ah rei tak a lo zui tawh Erwin Bach nen an innei a, hemi kumah vek hian Swiss citizen a ni ta bawk. Tina hian fapa pahnih, Raymond Craig leh Ronald te a nei a ni
Rimawi khawvela arsi lian Tina Turner a her liam ta
Get real time updates directly on you device, subscribe now.