MNF khan sum an enkawl thiam lo, An ni aia enkawl thiam lo chu ZPM – Lalnunmawia Chuaungo

MNF khan sum an enkawl thiam lo,
An ni aia enkawl thiam lo chu ZPM
– Lalnunmawia Chuaungo
MNF sawrkar khan sum an enkawl thiam lo em em a, an ni aia enkawl thiam lo zawk chu ZPM sawrkar a ni tih Congress hruaitu Lalnunmawia Chuaungo chuan a sawi.
November 29-a Congress Bhawan-ah political session-ah MPCC senior vice president Lalnunmawia Chuaungo hian, LAD minister-in sawrkarin sum harsatna vang tia village council term an pawh tawi chu chhuanlam tling a ni loa, Lushai Hills Village Council Act 1953 Section 5 hnuaiah sawrkarin pawhtawi theihna nei mah se, a nawm a maka pawhseia pawhtawi theih a ni loa, chhan leh vang mumal tak a awm tur a ni tih a sawi.
“Senior minister pahnihin tunhnaiah VC-ten min thawhpui tha duhlo an ti a. Mipuiin kan aiawh tura kum 5 chhunga rorel tura kan thlan chhuahte thawhpui duhlohna hi democracy kalh a ni. Ram leh hnam hmasawnna atan VC-te hian thawhpui duh loh an nei ngai lo. Congress leh MNF sawrkarah pawh a awm ngai lo. Thuneihna hman dikloh, hmansualna dik tak a ni a. Hengte hi sum enkawl thiam loh rah a ni,” a ti.
Congress sawrkar laiin Mizoramah a lo chhuak a, Finance commissioner hna chelhtir a ni a. Chu’ng hunlai chuan state matching share pek theih loh an nei ngai lo tih chief secretary hlui ni bawk Lalnunmawia Chuaungo hian a sawi. “Sawrkar hnathawk hlawh a hun taka pek thin a ni a, pension pek chhuah nghal thin a ni bawk. Chuti khawp chuan Congress sawrkar khan sum dinhmun a sawhnghet a. Chumi tichiangtu chu 15th Finance Commission kha a ni a, an ni khan an zirchiannaah Mizoram sawrkar sum dinhmun kha a tha tih an hmu a, Congress sawrkarin sum a enkawl that ang zela kal chho tur milin Post Develutionary Deficit Grant hi a tahtawlin an tihniam a ni,” a ti.
MNF sawrkarin sum an enkawl thiam lo em em a, an ni aia enkawl thiamlo zawk chu ZPM sawrkar a ni tih MPCC hruaitu hian a sawi a. SASCI sum an tih lapse chhan pawh department-ah sum an pekchhuah loh vang a ni, tiin, “Sum awmsa kha minister-te chenna incheina atante, Board chairman hlawh atante, tul lem loa sum tamtak an senral vang a ni. Central-in state tan sum an rawn pek, department-ah an pechhuak thei loa, state matching share kan pe thei loa, chuvangin cheng vaibelchhe 233 an ti lapse a ni. Mizoram ang sum lakluhna dang nei loin heti zat an ti lapse ringawt mai hi a uiawm takzet a ni,” a ti.
Power sector chu technical leh commercial tak a ni a, hriatthiam harsa tak a ni tih chief secretary hlui hian a sawi. NEEPCO chungchang Power minister -in hmannia a sawite chu thil a hriatchian loh vang leh a man loh vang nia sawiin, “He thu hi sawiho an huam a nih chuan kan inpeih reng. Sawisel tum ngawr ngawr vang niloin, thil diklo a thlen kan duh loh avang leh thil dik hailan kan duh vang a ni,” a ti.
Lengpui Airport pawh Air Force kuta hlan tumna a kal zel nia an hriat thu leh airport hi tihchangtluna tih len zel a, tih hmasawn zel kan mamawh a. Chumi atana rokhawlhna siam thei tur leh airport-in hma a sawnna dal theitu tur chu Indian Airforce kuta hlan chu a ni tih a sawi. Indian Airfoce nen kan airport neihchhun hman ho chu ram leh hnam tan a him loa, chutiang chu Congress party chuan an do char char a tul dawn tih a sawi.