Tuichangral leh Tuipuiral Games Olympic hawi zawngin kalpui tum

Tuichangral leh Tuipuiral Games
Olympic hawi zawngin kalpui tum
Mizoram sawrkarin Olympic 2036-ah Mizo infiammi tam thei ang ber tirh a tum avangin bial/hmun huap anga kumtin infiamna kutpui huaihawt thin Tuichangral Games 2025 leh Tuipuiral Games 2025 chu hemi lam hawi zawng hian kalpui tum a ni a, Olympic Games-a tel sports discipline ho telh tharin ‘pilot project’ a hman a ni dawn.
Tuichangral Games 2025 leh Tuipuiral Games 2025 a sports discipline telh belh chungchang hi Sports minister Lalnghinglova Hmar hoa sawiho niin, Tuichangral Games-ah hian boxing, wrestling leh weightlifting telh belh tur niin, Tuipuiral Games-ah boxing leh archery telh belh tur a ni.
Sports minister chuan Mizoram sawrkarin Olympic 2036-ah Mizo infiammi tam thei ang ber tirh a tum a. Tuipuiral GSA leh Tuichangral GSA chu kumtina infiamna kutpui buatsaih thin an nih angin, pilot project atan thlan an ni tih a sawi. Tunhnaiah Mizoramin national leh international level-a intihsiaknaah result duhawm tak tak kan nei tih sawiin, “Kan rilru in National Games mai bakah Asian Games leh Olympic Games thlengin hlawhtlinna a ngaihtuah ngam tur a ni,” a ti.
Tuipuiral GSA hnuaiah hian association 25 awmin, Tuipuiral Annual Sports Meet vawi 52-na hi 2025 January 13 atangin Samthangah neih a ni dawn a. Kumdanga sports discipline an kalpui thin bakah state sports association-te nen tangtlangin boxing leh archery an telh dawn a ni. Tuichangral GSA hnuaiah hian association 33 an awm a, 2025 March 31 – April 9 chhung hian East Lungdar-a games an neih turah state sports association nen tangtlangin kum 8-16 inkar tan boxing, wrestling leh weightlifting an telh ang. Mizoram sawrkar chuan heng sports discipline-ah hian cheng nuai khat theuhin a pui dawn a ni.
Heng sports discipline telh tura inbuatsaih ngai hrang hrang sawiho a ni a. Sports association-te nen tanghoin Sports & Youth Services department hnuaia coach-te bakah senior player-ten training an pe hmasa dawn a. Training hi games tan hmain Tuipuiral leh Tuichangral huamchunga khaw thlanchhuah bikah kalchilhin an pe thin dawn a ni.