Sawrkar leh HPC-D(LS) inremna thuthlung ziak

Mizoram sawrkar leh Hmar People’s Convention -Democratic (Lalhmingthanga Sanate’s Faction) chuan Thawhlehni khan Sakawrdai-ah memorandum of settlement (MoS) an ziak.
MoS-ah hian sawrkar aiawhin Home secretary David Lalthantluanga leh HPC-D (LS) aiawhin an president Lalhmingthanga Sanate-in hming an ziahhnan a. Adviser to chief minister (Political) Lalmuanpuia Punte, MLA leh DIG (Northern Range) Rodingliana Chawngthu ten an hmanpui.
Adviser to CM chuan hmasawnna kan hmuh tur anga kan ngaih kan hmuh tawk loh vangin helna a chhuak thin, tiin, inremna hian hmasawnna hnathawh a keng tel tih a sawi a, hlawhtlinna tluantling hmuh ngei a beisei tih a saw. “Mizoramah hnam bil hel pawl an awm tawh lo niin kan hria a, ka lawm takzet a ni,” a ti.
Home secretary pawhin Mizoramin remna leh muanna kawnga rahbi thar a kai chu a hlu hle tih a sawi a. HPC ( Hmar People’s Convention) chu kum 1986-ah a piang a, 1994 ah remna thuthlung ziahpui an ni a; 2018 ah HPC atanga peng chhuak HPC (D) nen inremna thuthlung ziah a ni leh a, vawiinah peng dang HPC-D (LF) nen inremna ziah a ni leh, tiin, “Mizorama ralthuam keng hel pawl an awm tawh lo hi a thlamuanthlak hle,” a ti.
Mauchar khaw daiah HPC-D (LF) awm lailawkna tur Peace Camp siam a ni tih Home secretary hian a sawi a. Kumin April 30-ah silai tun (laying of arms) inkhawm neih a ni dawn tih a sawi a ni.
HPC-D (LF) president Lalhmingthanga Sanate chuan kum 33 chhung an ralmu a, inremna thleng tur hian thil tam tak an chân niin a sawi. Chief minister, Home minister, adviser to CM (Political) bakah Home department official-te chungah lawmthu sawiin, “Kan duhthusam ang tak inremna a ni lo chungin, lungawi tawn theihna tur thil a ni hi a lawmawm,” a ti.
Hmar tlangdung hmasawnna tur Mizoram sawrkarin a ngaihsak dawn a ni tih rinna nen nunphung pangngai zawm turin an rawn chhuak tih a sawi a. An ni lam pawhin inremna thuthlung tihlawhtling turin theihtawp an chhuah dawn tih a sawi bawk.
Memorandum of settlement ziahnaah Home department hotute, Mizoram Police hotute leh sawmbik sawrkar official, kohhran leh tlawmngai pawl aiawhte an tel a. Ruahman lawk dan chuan, HPC-D(LS) mi leh sa 43 tan Mizoram sawrkar chuan April 30 khian CTI Sesawng-ah Laying of Arms Ceremony (silai tun inkhawm) a buatsaih dawn a ni.
Sawrkar leh HPC-D(LF) inremna kalkawng:
8 Mizoram sawrkar chuan Mizorama ralthuam keng chi bil hel pawl la awmchhun nia hriat HPC-D (LF) hi 2024 kum laihawl atangin a dawr tan a, 2024 September 20 khan Silchar Mizoram House ah inbiakna hmasa ber neiin, boruak tha tak hnuaia inthlahliam a ni.
8 2025 October 10-ah Assembly speaker Lalbiakzama pisaah inbiak vawi hnihna neiin, hetah hian an thil phut (charter of demand) an rawn pharh a, tha taka sawiho a ni.
8 Home minister kaihhruai Committee lian din a ni a, 2025 October 28 khan thutkhawm a ni. Inbiak tawh dan thlirho niin HPC-D (LF) te demand sawiho a nih bakah Mizoram sawrkar duhdan sawifel a ni.
8 2025 December 1 khan Aijal Club-ah inbiak vawi thumna neih a ni a. Mizoram sawrkar duhdan hrilhhriat an ni. December 2-ah HPC-D (LF) hian Mizoram sawrkar duhdan an pawm a; anmahni lam thil phut thenkhat ziakin Home department-ah an thlen.
8 Official level-a indawr chhunzawm zel niin, 2026 March 30-ah adviser to CM (Political) Lalmuanpuia Punte pisaah inbiakna hnuhnung ber neih a ni a, engkim a tul tur ang sawiho niin, 2026 April 9 khan Home minister hoin official-ten uluk takin an thirho hnuah ruahmanna siam a ni a, inremna ziahfel a ni thei ta a ni.