BJP Mizoram Pradesh thupuangtu Lalremsangi Fanai chuan MNF sawrkar chhiat leh that tehna chu Assembly rorelna leh budget document-ten a tichiang hle tih sawiin, House chhunga minister leh MLA te thusawi, zawhna leh chhanna a inkawkalh nuai tih a sawi.
“Sawrkar leh mipui tana manganna rapthlak ber chu sum puk leh mipui leiba pung a ni a; India ram state sawrkar tha leh tha lo tehna chu mipui leiba an tihpun zat a ni. MNF sawrkar chuan a theihna apiangah sum a puk a, kum 2023 chhunga leiba kan neih tur hi vaibelchhe 13584 chuang niin, kan ram inrelbawlna pumpui atana ruahman zat vaibelchhe 14209 deuh thaw leiba kan nei dawn a ni,” a ti.
Assembly House chhung leh politics platform hrang hrangah mipui dawt hrilh nasa lutuk leh policy flagship programme thlenga nitin dawt phuahchawp thintute chu ram hmelma an ni tih Lalremsangi Fanai hian a sawi.
Ruling MLA rualten Finance department kal dan fello an sawisel ngamlo tih a sawi a, demawm a tih thu a sawi. “Chief minister-in Mizo mipui leiba tipung zawng ringawta Mizoram a enkawl hi a him loa, thla ruk chhung rorelna hun an la neihah hian leiba tipung zawng a hma la tawh lo turin kan ngen a ni,” BJP Mizoram thupuangtu hian a ti.