Sawrkar laipuia minister of state for Telecommunications Devusinh Chauhan chuan zan khat riak turin Zirtawpni khan Serchhip a thleng a, district official-te nen an inkawm bakah MJA Serchhip District, Sub-Hqrs YMA, Joint Village Council leh kohhran hruaitute a hrang theuhin a kawm a, hemi hnu hian Serchhip District Hospital leh Post Office a tlawh.
Union MoS chuan Prime minister Narendra Modi-a’n India hmarchhak hmasawnna a ngaipawimawhin a vei em em a, a minister-te chu hmarchhak state tlawh vek tura a tih anga bawhzui a ni tih a sawi a. Serchhip district-a sawrkar laipuiin hmasawnna hna a thawhte a mit ngeia a hmuh thu leh heng hnathawhte tha taka tihhlawhtlin a nih chu an duhthusam a ni tih a sawi. An duhkhawp lohna lai leh tan lak ngai lai a awm a nih chuan a hnena thlen turin official-te a chah a, postal service (dak) tihchak lehzual kawngah tan lak a nih tur thute, internet connectivity tihhmasawn lehzual a nih thute sawiin, India Post hnuaiah hamthatna chi hrang hrang miretheite hnen thleng thei awm chu ngaihvena chhawr tangkai turin mipuite a sawm a ni.
Serhhip district bawrhsap Nazuk Kumar chuan district dinhmun leh sawrkarin hmasawnna hna a thawhte sawifiahin, SP Stephen Lalrinawma’n police-in dan leh thupek kenkawh kawnga hna an thawh dan a sawifiah bawk.
Union MoS Devusinh Chauhan hian vawiinah Aizawlah state sawrkar hotute a kawm ve leh dawn a, Raj Bhavan ah a riak ang.