MNF sawrkar leh hunah MDC ‘uire’ theihna tihtawp tum ang – Zoramthanga

MNF sawrkar leh hunah MDC
‘uire’ theihna tihtawp tum ang
– Zoramthanga
MNF a sawrkar leh hunah District Council member (MDC) te duh duha political party danga an pakai theihna chu dang turin Parliament-ah dan pass tir tumin hma an la dawn tih an party president Zoramthanga chuan a sawi.
Zirtawpnia Lawngtlai leh Siaha a tlawhnaah MNF president chuan MDC-te party danga an pakai theih lohna turin Parliament-a dan siamthat tir tuma theihtawp an chhuah tur thu a sawi a. Pathianin MNF hmelmate a sut tluk sak dan chu MNF chakna hmangin a ni ngai loa, a chawi sang te te a, an tlachhe leh mai thin niin a sawi.
“PC leh Congress an han lal tak tak mai chu lal chiang tak an ni. ZPM pawh hi mipui min hriatchian tir theihnan a lal tir zet a, mipuiin kan hrechiang ta mek. Engmah an lo ni lo tih a lang a, a ni telin an hniam raih raih. An sawrkar leh angem, tih lam a ni lo, tun term hi an daih angem, tih chu mipui zawhna a ni tawh,” a ti.
Mizoramah political party tam tak an ral tawh a. PC an ral a, Congress lah an chak lo telh telh, tiin Zoramthanga hian a sawi. “Tuna party lian pahnih chu MNF leh ZPM kan ni ta a. Indo, underground politics leh thil hrang hrang MNF hian a paltlang nasa lutuk. Chuti chung chuan MNF hi Mizorama party ruhrel lian ber kan la ni mek. Sawrkar leh tura mipui beisei kan ni leh mek,” a ti.