MNF sawrkarin BJP sawrkar a tawng kawlh a, a tlak phah – MNF adviser

Raltlan tuamhlawm chungchangah leh Uniform Civil Code-ah te MNF sawrkarin BJP sawrkar a tawng kawlh belh zel a, hnam leh sakhua humhimnaa a beihna lamah a tlak phah tih MNF adviser Denghmingthanga chuan a sawi.
MNF office, Mizo Hnam Runa Zirtawpni inkhawmah Denghmingthanga chuan ram leh hnam tana zalenna sual tura ruat an ni chu lawm tur an ni, tiin, “Keini ang hi Zofate zingah a thlak thei tur an awm tawh lo,” a ti. Mizo hnam leh sakhua humhim tura Pathianin a ruat avangin ramri ah MNF chu inchi khat pawhin a hnung tawlh duh loa, hnam movement kengtu a nih avangin BJP sawrkar an tawng kawlh phah a, hmasawnna ruahman leh hmachhawp zawng zawng a tlawlh phah tih a sawi.
“Raltlan tam tak, BJP sawrkarin lo tuamhlawm an phal loh kha kan lo kuangkuah zel a, kan tawng kawlh zual sauh a. Pathianin hnam humhim tura a ruat kan nih avangin, sakhaw hotute pawh a hneh a, Uniform Civil Code leh biometric thlengin kan sawrkar khan inthliarna awm theia a rin avangin a hnial leh a, kan hnam leh sakhua humhim nan MNF sawrkar kha a tlak phah. Mah se, Pathianin sakhua leh hnam himna tura a hmanruaa min hman avangin lawm ang u,” a ti.
MNF-in zu a duh lo tlat thin avangin lawm tur an ni bawk tih MNF adviser hian sawiin, MNF sawrkarin a zuar lo ngam kha a Pathian thu em em a, zu zawrh phal avangin damdawi a hluar chuang lo tih a sawi. Hei hi doctor thenkhat research beihnaah pawh an hmuhchhuah a nih thu leh Bible tanchhan chungin MNF chuan zu an do zel tur thu a sawi bawk.