Modi-a’n Nepal-a sorkar siam tur RSP hruaitute bia

Prime Minister Narendra Modi-a chuan Nepal-a Rastriya Swatantra Party (RSP) chairman Rabi Lamichhane leh Himalayan tlangdung rama sorkar thar kaihruai tura sawi, Balendra Shah te a bia.
Social media-ah Modi-a chuan hruaitu pahnihte Nepal inthlanpuiah hnehna an chan leh RSP hlawhtlinna ropui tak avangin a lawmpui tih a hrilh tih a tar lang.
“Rastriya Swatantra Party (RSP) Chairman Pu Rabi Lamichhane leh RSP Senior Leader Pu Balendra Shah te nen telephone-ah tha takin kan inbia a ni,” tiin X-ah hian a tar lang a ni.
Ram pahnihte hausakna leh hamthatna tura Nepal sorkar thar nena thawkdun tura India inpekna leh a inpeih thu a hrilh bawk.
“Hruaitu pahnihten inthlanna hnehna an chan leh Nepal inthlanpuiah RSP hlawhtlinna ropui tak avangin ka lawmpui thu ka hrilh a. An sorkar thar lo awm tur leh kan ram pahnihte hausakna, hmasawnna leh hamthatna atana India-in anmahni thawhpui tura a a duh thu ka hrilh a ni,” a ti.
“Kan tan dunna hmang hian India leh Nepal inlaichinna chuan kum lo awm turah hmasawnna thar a thlen ngei ka ring,” a ti bawk.
Modi-a’n RSP hruaitute a biak hi Ningania Nepal-a inthlanpui neih a nih hnuah a ni a, he inthlan hi thalaite kaihhruaia sorkar paih thlak a nih hnua a hmasa ber a ni.
Kum 35 mi, rapper thin, Balendra Shah-a kaihhruai RSP chu hnehna changtu an ni a, hnehna ropui tak a chang a, hei hian Nepal-a hman atanga an lo rin tawh party ‘hlun tak tak’ atanga hmel thar hmanga inthlakna a lantir nia ngaih a ni.
Inthlan result hian mipuiten politic boruak muanawm lo, ei rukna leh thalai hnathawh tur nei lo tam vanga mi tam tak lungawi lohzia a tilang chianga ngaih a ni bawk.
RSP hian a thenawm ram pahnihte nena inzawmna nghet tak neih a tum a, hetih rual hian an ram chhungah an thenawmten huhang an neih lohna tura kal erawh a tum thu an sawi tawh.
Balendra Shah-a hi India nena mi mala inzawmna nei a ni a, Madhesi community atanga piang a ni a, Karnataka atangin structural engineering-ah Masters a zir chhuak bawk.