Modi-a’n Seychelles a tlawh hunah patrol lawng hlan dawn

hhunga Prime Minister Narendra Modi-a’n Indian Ocean-a thliarkar awm khawm ram, Seychelles a tlawh hunah patrol lawng a hlan dawn a, hei hi helai chhehvela ram tenau zawkte nen tanghova venhimna leh thlithlaina tihchak a tumna a ni.
Modi-a hian Inrinni atanga Thawhtanni thleng Seychelles hi a tlawh dawn a, an ram golden jubilee lawmnaah khual zahawm a ni dawn tih external affairs ministry chuan Ningani khan a puang a. National day lawmnaah hian Indian defence force contingent pakhat leh Indian Navy lawng pahnih an tel dawn a ni.
Prime minister hian President Patrick Herminie-a a kawm dawn a, ram pahnihte thawhhona leh an chhehvel leh khawvel hual thil hrang hrang an sawi dun ang a, an ram national assembly-ah thu a sawi bawk ang a. Modi-a hi India prime minister zingah Sychelles National Assembly-a thutkhawm hun pangngai ni lova thu sawi hmasa ber tur a ni dawn a ni.
External affairs ministry chuan Seychelles hi India-in Vision MAHASAGAR (Mutual & Holistic Advancement for Security & Growth Across Regions) a kalpui mekah tuipuia a thawhpui a thenawm ram pawimawh a nih thu a sawi a, Modi-a’n a tlawh tur hian ram pahnihte inlaichinna tihchak turin a pui dawn tih a sawi bawk.
Modi-a hian Seychelles a tlawh hnuhnun ber chu kum 11 kalta kha a ni a, hemi hnu hian ram pahnihte venhimna, hmasawnna leh tuipuia thawhdunna a thang zel a. Tun tum a zina thil pawimawh tak chu Seychelles Coast Guard kuta patrol lawng chak chi a hlan tur hi a ni dawn a, hei hi a hmaa Dornier aircraft pahnih leh patrol boat eng emaw zat a lo pek tawh kal zel a ni ang a, Indian sipai dah a ni bawk dawn niin thil hre chiang pakhat chuan a sawi.
Seychelles chuan tuipui venhimna tura tangrual – India, Maldives, Mauritius leh Sri Lanka te telna, Colombo Security Conclave-ah tel a tum a. Kumin hian Lamitye military exercise chu sipai chi thum telna tura tihthar a ni a, Seychelles hi sipai nunchan zirna, Milan leh Pragati-ah pawh a tel ve bawk.
Mozambique Channel bula tuikawng pawimawh taka thliarkar 115 awmna, Seychelles hian a chhehvel thlithlai theihna a nei tlem hle a, Indian Ocean khawthlang lama lawng suam, ruihhlo tawlh, dan lova sangha man leh hlauhawm dangte dona kawngah India chu puihnaah a innghat hle a ni.
February thlaa Herminie-a’n India a tlawh tum khan India chuan special economic package $ maktaduai 175 a pek tur thu a puang a, ram hnih hian Joint Vision SESEL (Sustainability, Economic Growth & Security through Enhanced Linkages) an pawm a, hei hi hman nawn theih energy, digital, hriselna kaihhnawih leh tuipui thlithlaia kal dan tur a huam a. Heng hmalakna hnuaia project eng emaw zat chu Pathianniah hawn tum nia sawi a ni.
Indian cheng pawh 15,000 vel awmin Seychelles-a cheng mi 1,33,000 zinga 12% vel an tling a, heng mite hi Modi-a pawh hian Pathianni hian a kawm dawn a ni.