Prime Minister Narendra Modi chuan Rajya Sabha-a thu sawina a neihah opposition tena Adani Group chungchangah an auel chungin BJP symbol “Lotus chu eng ang pawhin chirh min theh ula a par vul dawn tho,” tiin a sawi.
-- Advertisement --
“Member thenkhatte chet dan leh tawngkamte hi ram tana hrilhhaithlak a ni a. Heng mite hnenah hian sawi duh ka neih chu – chirh min theh tam poh leh lotus a vul zual zel ang. Lotus vul zel nan tihtur in neih a inang vek. Opposition te hnenah lawmthu kan sawi,” tiin Rajya Sabha-ah a sawi a.
Prime Minister thusawi tura a din veleh opposition member te chu House laiah kalkhawmin billionaire Gautam Adani conglomerate te Hindenberg Research report-in a puhnate chu chhui chiang turin Joint Parliamentary Committee investigation neih an ngiatin an au a.
PM Modi chuan ‘Adani chhui chian’ an ngiat chu engahmah ngai lovin a thusawi a sawi map map thung a, a sorkar hmalakna leh a hmaa sorkar Congress te hmalakna chu a khaikhin zui bawk.
“Congress-te khan hmasawnna lamah harsatna tin an siam a, India in kum 60 lawih hmasawnna tur a hloh a ni. Congress te khan ‘tokenism’ bak buaipui an nei lo va, ramin harsatna a neih chinfel hlen an ngaihtuah duh ngai lo. Keini chuan permanent solution siam turin hma kan la zel a ni,” tiin PM Modi chuan a sawi.
Congress te chu voters tena an hnawl tawh chungin ‘phiarrukna nen an la tang zui zel’ tiin a sawi bawk a.
Congress leh opposition party dangte chuan PM Modi chu Gautam Adani hausa turua siamtu tiin an puh a, sector hrang hrangah Adani group te tiliantu ber an ti bawk. Nilaini khan Rahul Gandhi leh Congress leader dangte chuan Prime Minister chuan Lok Sabha a thusawina a neihah crony capitalism chungchang chu a kalkan zaih an ti bawk a.
Rahul Gandhi chuan eng vangin nge Lok Sabha-a PM leh Adani te chungchang a sawi chu paih a nih tiin zawhna a siam bawk a. Congress chief Mallikarjun Kharge pawhin Rajya Sabha-a a hma nia a thusawi nuaibo a ni chu a lungawiloh thu a sawi bawk.
PM Modi chuan ‘permanent solution’ an zawng zel tia sawiin, Jan Dhan bank account scheme chu India banking system harsatna sutkiana miretheite hnena thlen phakna a ni a ti bawk.
A sorkar chuan LPG leh electricity chu India thingtlang khua kilkhawr berah pawh an pek tawh thu sawiin chu chu sorkar hmasa te tih theih loh a ni a ti bawk a. Hmeichhia te tan 11 crore toilet kan siam tawh a, hmeichhia rai te tanpuina kan pe bawk a. “Save the Girl Child hmangin chiled sex ration-in hma a sawn,” a ti bawk.
Mi thenkhatte chuan sorkar scheme te Sanskrit hminga dahah harsatna an nei tia sawiin mahse Nehru-Gandhi family hming chawia scheme phuah sawi langin, “Eng vangin nge Jawahar Lal Nehru thlahte hian a hming tawp hman an hlauh em em?” tiin Modi chuan zawhna a siam bawk a. He ram hi a khua leh tui te thisen, thlan leh mittui hmanga din a ni a, chungkaw pakhat ta a ni lo, a ti zui bawk a.
“Eng nge Nehru surname hman chu in zah em em” ti zuiin, “Nehru kha mi ropui tak a nih chuan, eng vangin nge a chhungten ‘Nehru’ surname hman an hreh em em” a ti.
PM Modi chuan Centre chu State sorkar tibuaitu tia an puh pawh chhangin, chief minister ka nih tawh avangin federalism pawimawhna hi ka hre khawp a ti a. Indira Gandhi Prime Minister a nih lai khan Article 356 hi State sorkar te rorel khum nan a chelek zawk thin a ti bawk a.
PM Modi thusawi lai hian opposition te chuan an auel reng thung a, tichung chuan sawi hmiah hmiahin a thusawi zawhah House a chhuahsan zui nghal vang vang bawk.
President’s address a Motions of Thanks amendment pakhatmah passed a ni lo va, amendment 113 te chu vote tur chhawpchhuah niin House MP majority ten an hnawl a. House member tena Adani issue sawiho an ngiat avangin a buai nuai nuai zui zel a ni.
Chairman of the Rajya Sabha Jagdeep Dhankhar-an budget sawihona kalpui a tum pawh opposition tena Adani issue sawiho an ngiat zuina leh ruling lamin chhanlet dana ‘Modi Modi’ tia an aurual leh ‘Bharat Mata ki Jai’ an tihzui zel avangin engmah kalpui hleih theih loh a awm zui ta zel a ni. Hei vang hian Chairman Jagdeep Dhankhar chuan House chu a hnua thukhawm turin a titawp lailawk ta tawp bawk.