Modi leh Rahul ten eirukna aupui ve ve

Lok Sabha inthlan chuan a vanglai tawng mekin Prime Minister Narendra Modi leh Congress leader Rahul Gandhi te chuan Northeast Delhi leh Chandini Chowk Lok Sabha constituency a rally an neihah ‘eirukna’ in hmun lailum a luah ve ve.
Modi chuan INDIA bloc party te chu Delhi mipuite rawktu leh heng politician eirukna nuaibo tuma insawi te chu scam hrang hrangah inhnamhnawihin lung in an tang mek a ti a. Gandhi thung chuan Modi sorkar hnuaiah mi pangngai ten hlawkna an chang lo va, industrialist hausa tlemte te chauhin an hlawkpui a ti ve thung a. Electoral bonds sawi langin dik lo taka kalpui a ni a, BJP a donation pe tu te chu central agencies ten an chhui zingah an tel lo zel a ti thung.
Delhi Chief Minister Arvind Kejriwal, interim bail hmang chhuak mek pawhin nasa taka campaign kalpui mekin West Delhi constituency mipuite chu lung in a chhuahsan hlen theih nan INDIA bloc te hnena vote pe turin a ngen bawk.

-- Advertisement --

‘Thian leh inchai’
AAP leh Congress tena Delhi a 4-3 a seat an insem chungchang sawiin Modi chuan, “Congress te chuan liquor scam lailanah an hmalakna an ti a, a hnuah erawh kut an suihzawmpui leh a” a ti a, “Congress te hian Delhi leh Haryana-ah thianthatna, Punjab-ah erawh inbeihna an kalpui a ni” tiin a sawi bawk a. AAP leh Congress-te chuan Punjab-ah seat-sharing an kalpui lo.
Modi chuan Congress te chuan Delhi ah hun rei tak ro an rel tawh laiin tunah chuan anmahni chauh chuan seat li pawh an chuh ngam tawh lo a ti bawk a. Congress manifesto chu Muslim League’s manifesto nen thuhmun reng a ni a, Congress party te chuan ‘inhauskana chhuhsak che u in, an vote bank te hnenah pek an tum a ni’ a ti bawk.
Prime Minister chuan Citizenship (Amendment) Act hman tan hnua kum 2020 Delhi riot thlenna chhanah opposition te chu a puh bawk a. Mi tam tak a tam ber Dalits te thenawm rama tihduhdah tuar nasa te chu un hnaiah khua leh tui nihna pek an ni a ti a. Opposition alliance te chuan sakhuana behchhan reservation tih an thlawp a, Article 370 tharthawh leh bakah India nuclear bomb te nuaibo an duh, tiin Modi chuan a sawi bawk.

‘Debate ngam lo’
Rahul Gandhi thung chuan Prime Minister chu amah nena inhnial ngam lo a ti ve sak thung a. “PM Modi hian a favourite journalist te hnenah non-stop interview a pek reng laiin keimah nena debate a cho tlat lo, a chhan chu ka zawhna te a chhang thei dawn lo tih a hria a ni” tiin a sawi thung.
“PM Modi hian Congress te chuan Adani-Ambani te hnen atangin sum tam tak an dawng a tia a, enga tinge a chuichian tir ngam leh chuan si loh,” tiin a sawi bawk.
Gandhi chuan ‘PM Modi nen khawiah pawh a duhna hmun apiangah debate ka inpeih reng’ tia sawiin, “Mahse, a lokal dawn lo tih ka hre thung,” a ti a. PM Modi hnena ka zawhna hmasa ber tur chu Adani nena an inlaichinna a ni ang? A dawt lehah electoral bonds chungchang ka zawt ang tiin Congress chief hlui chuan a sawi bawk.
Debate chu zawhna pahnih te khi ka zawh hnuah a tawp zui mai ang a ti a, mahse, Prime Minister chu COVID laia mipui ten an tawrh em em lai khan eng vanga mipuite chu bungbel khawngri tur leh mobile phone flash tura a tih le tih ka zawt duh bawk a ti bawk a. “Min debate pui miah dawn lo va, mahse, a rally neihnaah issue ka sawi te a sawi zui nghal zel a. Eng vanga Adani-Ambani te sawi lang ngai miah lo tih ka sawi hnu lawkah a sawi zui nghal,” a ti bawk.
AAP-Congress alliance chungchangah Gandhi chuan tun inthlanah AAP button ka hmet ang a, Kejriwal pawhin Congress buttona hmet ang. “Kan zavaia kan tum chu Constitution humhim a ni. AAP leh Congress worker te pawh an consittuency theuha theihtawp chhuah turin ka ngen a ni,” a ti bawk.
Congress leh INDIA bloc ten sorkarna siam te an tihhmasak tur zawhna pawh Gandhi chuan, “Agniveer scheme bawlhhlawhbawmah kan thlak ang, GST kan tiawlsam ang a, industrialist lian te aiah sumdawng tenau te kan tanpui ang,” a ti bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More