Monitoring Team-in airport cheithat hna muang an ti hle

Mizoram State Monitoring Committee chuan Nilaini khan Lengpui Airport cheithat hna thawh mek chu an vice chairman R Lal Rinawma hoin an tlawh a. Hna thawh hi chak lo an ti a, chak zawka thawk turin thawktute an chah.
MSPMC hian Lengpui Airport cheithat hna thawh mek hi kumin April 22 khan an lo tlawh tawh a, a hnuah member tlem zawk intirin June 6 khan an tlawh leh a ni. Heta an thil hmuh leh siamthat ngai chu kumin June 10-a MSPMC general body meeting-a an sawi ho hnuah rawtna engemawzata mawhphurtu department-ah an thlen tawh. PWD, PHE leh P&E leh Aviation Wing nen April 16&18 khan an sawiho bakah a enkawltu department leh contractor-te nen hna tha taka a kal zel theih dan tur ruahmanna siam chhoh zel tura tih a ni.
MSPMC Team hian rawtna hrang hrang an siam tawh angin hna hi kalpui a ni em tih an en leh a, ruahman ang taka a puitlin theih nan MSPMC chuan a tul angin vil zui zel an tum tih an sawi a ni. Contractor-te hnathawh a chak lo hle in an hria a, chak zawka thawh chhunzawm a nih theih dan tur leh hna peng hrang hrang thawhho dan tur an sawiho bawk.
Nilaini vek khan Monitoring Team hian NH-44A Tlawng lui kanna tur lei (steel arch – semi through bridge) lei dawh hna thawh mek chu an en nghal a. He lei hi Ministry of Road Transport & Highways project niin, EPC node-a thawh a ni. Contractor chu Poddar Infratech Pvt. Ltd New Delhi a ni. A sei zawng hi metre 102 a ni a, he hna thawhna atana an inremna zat chu cheng vaibelchhe 36.99 a ni. Hmun 4-a thena hmun 5 zawh tawh a ni a, kumin September-ah zawh hman tum a ni.
Lei dawhna hmanraw hrang hrang hi testing laboratory-a test hnua a tling chauh hman thin a ni tih MSPMC hi hrilh an ni.