Morocco-a in pahnih chimah mi 22 thi

Morocco-a in pahnih chimah mi 22 thi
Morocco-a Fez khawpuia in pahnih chimah mi 22 vel an thi a, mi dang 16-in hliam an tuar bawk.
Chhawng lia sang in pahnih hi Nilaini zing hma taka chim niin chhungkaw pariatin an luah lai niin tual chhung thuneituten an sawi tih sorkar chanchinbuin a sawi.
Moroccan chanchinbute chuan khawpuia chhimthlang lam daia veng thar, Al Massira-a awm niin kum eng emaw zat kal ta atang khan a rawih tawh hle niin an tar lang a, a chim chhan chhui mek a ni tih an tar lang.
Morocco hmarchhaka awm, Fez hi an rama khawpui upa ber zinga mi niin kum zabi pariatna laia din tawh niin mihring cheng pawh an tam ber pathumna a ni.
In chim kara mi zawn leh chhanchhuah hna chu thawh nghal a ni a. Video darhah chuan mi pungkhawm lei thim hnuaia in chim an hai lai pawh a lang.
News site Akhbarona-in video a dah chhuah pakhatah chuan hlanga ruang an zawn chhuak lai hmuh tur pawh a awm.
A bul hnai ina chengte pawh venthawn thilah thiar chhuah an ni tih sorkar chanchinbu chuan a sawi.
Hliam tuarte chu damdawi inah dah an ni a, an hliam dan pawh a inang lo nual.
Fez-a public prosecutor pisa chuan in pakhat zawk hi a ruak a, pakhat zawkah erawh naute piang thar lawma an pun khawm lai niin an sawi tih sorkar chanchinbu chuan a tar lang.
Chanchinbute chuan a chim chhan hi chhui nghal a ni tih an sawi a. Mi chengte chuan a sak dan hmang tha lo lutuk an sawisel mek bawk.
Fez hi thla tam lo tak liam taa thalaiten sorkar duh lohna an lantir lai pawh khana lantirna hmun kha a ni tel a, an thil phut zingah in leh hmun din tha zawka kalpui a tel.
Moroccan Housing Minister Adib Ben Ibrahim-a chuan January thla khan an rama in 13,700 vel chu a chim mai hlauhthawnawm a nih thu a lo sawi tawh.
May thlaah khan Fez-ah hian in dang chimah mi pakua an lo thi tawh a. February, 2024 khan ruah leh thli na tak thawk avangin khawpui hluia in chimah mi panga an lo thi tawh bawk.