Motor insu-ah mi pasarihin nunna chan

Nimin khan Madhya Pradesh Katni district khaw pakhatah truck leh auto-rickshaw an insu a, mi pasarihin nunna chanin, mi pathumin hliam na tak an tuar.
He chhiatna thlenna hmun hi Madhya Pradesh a Sihora-Majhgawan road an tihah a ni a, nunna chante hi mipa pali leh hmeichhia pathum an ni a. Chhiatna thlenna hmun atanga damdawiin hnai ber Sihora PHC ah lak nghal niin, hliamte hi enkawlna pek nghal an ni bawk.
Chhiatna a thleng tih a hriat veleh Sihora MLA Santosh Singh Badkare chuan mitthite a tawrhpui thu leh hliamte tan a theihtawp chhuaha tanpuina a chhuah tur thu a sawi nghal a, hmalatute leh tanpuina hnathawktu hrang hrangte chungah a lawmthu a sawi bawk. Nunna chante leh hliam tuarte chu puih an ngaihnaah puih a inhuam reng thu leh sum leh pai a ni emaw, an inenkawlna thlenga tanpui an ngaih chuan hrilh hre turin a chah bawk a ni.